SAMPIT | PANGKALANBUN | PALANGKA | KOTAWARINGIN | METROPOLIS | BARITO | GUMAS | DPRD SERUYAN
Selasa, 09 Februari 2016 21:20
Menggayai Bini

Hujan haur turunja sapanjang hari.  Mahadang hujan naung, Ongol santai badudukan  mangupi wan bininya di teras rumah, sambil malihati anaknya si Utuh Lantui nang rahatan mandi hujan.

“Bang, anak kita sudah kawaam bananaik ka pagar, kada lawas lagi SD am sudah,” ujar bini Ongol si Aluh Lintak mamulai pandiran. Ongol ne sambil asik makan biji tiwadak bajarang. “Hmm..” ujar Ongo manyahuti bininya tadi. “Kada karasaan bang lah sudah saganal itu,” ujar bini Ongol pulang, si Aluh Lintak. “Hmmm..” sahut Ongol pulang, sambil asik manguit gigi, ada nang sangkut pinanya. Mandangaar nang kyitu jawaban lagi, marangut si Aluh Lintak tadi.

“Pian neh, dibawai bapandiran, pina kada nyaman sahutan. Mandangarkah kada kah..!? ujar bini Ongol banyaring. “Hiih, aku mandangar jaa,” sahut Ongol pulang. “Memangnya napa ulun panderi tadi??” ujar bininya man tes. “Ikam minta diulahakan anak lagi,” sahut Ongol pulang, santai.

Manapak batis lakinya Aluh Lintak tadi mandangar kyitu sahutan. “Siapa nang bapadah kyitu, hanyar ja ulun bapadah anak kita sudah ganal. Kadanya minta diulahakan anak lagi pang..!” ujar Aluh.  “Kan sama haja ding. Biasanya amun ada kahandak, ikam pasti mangode,” ujar Ongol kada mau kalah. “Kadanya kyitu pang bang, lagian pian tahu ujar dukter rahim  ulun lagi kada boleh baisi bayi, dalam  dua tiga tahun ngini..!,” sahut Aluh Lintak. “Hehe, kaluai bisa mainjam rahim janda, nang parak langgar nitu,” sahut Ongol sangaja mamanasi bininya.

“Apaa..!!!, pian handak main gila kah!? Ujar Aluh Lintak bini Ongol bakuciak, sambil badiri wan manawak sandal ka Ongol. Untunya Ongol sampat ma les, wan manangkap sandal nang ditawakakan bininya tadi. “Akuii..bagayaan ja ah..” ujar Ongol manyahuti. “Bagaya kaah babujuran..! Ayo mangaku..!” ujar bininya pulang, sarek. “Amun ading sarik, abang bagaya aja gin,” sahut Ongol, sambil takariyum. “Haww. .amun ulun kada sarik pang?” ujar bininya pulang. “Hehe..mohon dibari restu ai..” ujar Ongol pulang. Napa ada  batambah kasarek bininya tadi, sampai bakuciak, manawak sandal pulang ka Ongol.

“Akaii..jangan nyaring-nyaring ding, kada nyaman didangar tetangga,” ujar Ongol limbah kana tawak sandal tadi. “Imbahnya pian, talalu banar amun bagayaan. Kada lucu tahu lah, bagayaan nang kyitu tu. Ucapan pian nitu bisa sabagian dari badoa, biarnya pian bagaya,” ujar Aluh Lintak pulang bamamai lawan lakinya. “Oooh, mintu kah umanya?” ujar Ongol manyahuti. “Iih, maka pian tu hati-hati amun bapander. Kena kajadian bujur tuu,” ujar Aluh Lintak. “Amun nang kyitu, tolong diaminakan ai ding, nyaman takabul,” ujar Ongol pulang, maulah hual lagi.

“Babungulan pian ni ah, koleram ulun bapanderan lawan pian. Dibawai bakisahan bujur-bujur malah kasana kamari kada karuan pandiran..! Mending ulun bapandiran lawan tembok wara..!” ujar Aluh Lintak nang sakali ini maraju, kada mauam mamanderi lakinya nitu.

“Jangan sayang, kasihan tembok dipanderi, kena runtuh inya mun mandangar pandiran ikam,” sahut Ongol pulang. Rupanya, hinip ja si Aluh Lintak neh kada mahirani lagiam, maraju bujuran rupanya. “Akuiii, nang kyitu ja maraju. Abang baya bagayaan ja dingai, nyaman awet muda,” ujar Ongol pulang mambisai. Rupanya tatap ha badiam si Aluh Lintak tadi, talanjur maraju sudah.

“Jangan mambuang muha nangkyitu pang..? kena diambil urang mancari barang bekas dingai.. senyum pang nyaman babengkeng,” ujar Ongol marayui bininya nang maraju tadi. Tatap ja Aluh Lintak kada manyahut, baya malirik budas ja sambil marangot.

“Yaa sudahai amun nang kyitu, kada mau bapandiran lagi,” ujar Ongol marasa kakalahan, sambil mambuka dompet manjuhut duit saratus ribuan.  “Paling kada ikam bapandir lawan kawal abang ni nah,” ujar Ongol pulang sambil manampaiakan duit tadi. Timbul nang kaya kilat tangan Aluh Lintak tadi manyambar duit nang bagambar Sukarno-Hatta nitu. Lawan langsung takariyum. Ongol maka, kalikikan geli melihat kalakuan bininya nitu. “Kanapa pian katawa, mahuluti ulun kah?” ujar Aluh Lintak pulang.

“Kada ah ding, abang suka ja, malihat ikam takarinyum pulang. Sakalinya, Pahlawan pruklamatur kita bung Karno wan Bung Hatta nitu, bisa mahibur saluruh hati urang sa Indonesiaan ni. Buktinya, hanyar malihat muhanya badua ja, ikam langsung takarinyum. Ampih manyarik,” ujar Ongol sambil manatawai si Aluh Lintak. (gus)

loading...

BACA JUGA

Kamis, 10 September 2015 21:57

54 Calhaj Diminta Fokus Jalani Ibadah

<p>KASONGAN - Sebanyak 54 calon haji asal Kabupaten Katingan yang tergabung dalam kelompok terbang…
Sitemap
  • HOME
  • HOT NEWS
  • NEWS UPDATE
  • KOLOM
  • RAGAM INFO
  • INSPIRASI
  • FEATURE
  • OLAHRAGA
  • EKONOMI
Find Us
Copyright © 2016 PT Duta Prokal Multimedia | Terverifikasi Dewan Pers