SAMPIT | PANGKALANBUN | PALANGKA | KOTAWARINGIN | METROPOLIS | BARITO | GUMAS | DPRD SERUYAN
Sabtu, 13 Februari 2016 21:17
Coklat Bakacang

Kakawanan Ongol, buhan Lengkor, Asoy, Dangdut wan Utuh umpat jua mangisahakan berita di tipi, nang rami urang batangkar mambahas parayaan hari valentin. “Aku kada paham jua napa nang dimaksud valentin nitu, maka rami urang mambahasnya, sampai ada nang bakakancangan urat gulu,” ujar Lengkor mambuka pandir.

“Amun ujar urang nang masih sakulahan, nitu tu paringatan urang nang bapacaran. Pabila ikam resmi baisi pacar, nah nangituam lalu disambat valentin,” ujar Asoy pulang. “Satahu aku, kada kyitu jua. Valentin nitu hari urang rami bajualan coklat, wan nang mampu manukarakan lalu mambariakan gasan nang kada mampu,” ujar Asoy pulang manambahi.

Asik buhannya mambahas nitu tadi, lalu datang si Ongol. “Ceeh, pina musti buhan ikam ngini mambahas valentin, tahu gin kada artinya. Makanya jangan katuju umpat-umpat urang nang kada jelas,” sahut Ongol. “Ceh, ikam gin amun tahu artinya..!” sahut Lengkor. “Nitu artinya hari coklat sadunia, jadi rami urang bamakanan coklat ja, pacangan maulah sakit gigi,” ujar Ongol pulang. Napa ada kalakakan tatawa kakawanannya mandangar nangkyitu jawaban Ongol tadi. Dikira buhannya tahu artinya, sakalinya asal sambat jua.

“Amun buhan ikam handak tahu asal muasalnya valentin ngitu, ayu kita batakun ja lawan Haji Untat. Pas aku disuruh sidin baelang ni,” ujar Ongol mambawai. Lalu buhannya tadi maumpati lawan Ongol, ka wadah Haji Untat.

Pas sampai, Haji Untat tadi lagi asik duduk basender di kursi santai di muka rumahnya, sambil bamakanan . Malihat bubuhan Ongol datang, sidin langsung manyuruh buhannya dudukan di lantai keramik plataran rumah sidin, sambil santai. Samantara sidin tatapha duduk di atas kursi, lagi asik mambaca surat.

“Lagi santai kah Ji?  ujar Ongol managur. “Yaam nah, lagi mambaca surat  kiriman cucu ku nang sakulah di luar negeri,” sahut Haji Untat. Dimeja higa Haji Untat ni duduk, ada mangkuk nang didalamnya ada kacang jambu mente. Malihat nangitu buhan Ongol tadi lalu umpat manjumput. “Minta ji lah kacangnya?” ujar Ongol manjumput, lalu umpatan jua Lengkor, Asoy sagalaan Dangdut wan Utuh Kalubut tadi bamakanan kacang jambu mente tadi.

“Nyaman ja lah Ngol?” ujar Haji Untat managur. “Inggih siip, nyaman ji ai, napa lagi sambil mangupi ni pas banar,” sahut Ongol pulang. Laluai Haji Untat ni mamasan minta ulahkan kupi wan pambantunya, gasan buhan Ongol tadi.

“Nituam nang dikirim anakku dari luar negeri sana, ada didalam coklat andakannya,” ujar Haji Untat pulang. Makin gancangai buhan Ongol ni tadi mamakannya, mandangar kacang nitu datangnya dari luar negeri.

“Anu ji, manaam coklatnya, orang ulun handak jua marasai coklat larang,” ujar Lengkor pulang.

“Naah, amun coklatnya sudah habisam ku kunyut. Nitu pang sisa kacangnya ja nang ku jamur dimangkok, nang urang makan nitu.   Ku kira kamanakan ku ne, mangirim hadiah coklat wara, sakali didalamnya ada kacang. Gigi ku nang ompong barataan ngini, maka kawa mangunyah kacang,” ujar Haji Untat.

Napa ada imbah tahu  asal muasal kacang tadi, manceleng mata buhan Ongol bacangangan satu sama lain. Maka rasa handak tamuak-muak, imbah sama-sama mangunyah kacang bakas dikunyut Haji Untat tadi. Imbah nitu, hancap bulikan bubuhannya, sambil maingkut parut, rasa handak tamuak. Lalu Ongol nang jadi katuyukannya, dimamai buhan Lengkor.

“Tuam Ngol, gawian ikam mambawa sagala ka wadah sidin, kisah handak manakuni sual valentin. Sakalinya marasani kacang bakas kunyutan sidin…!” ujar Asoy nang habut bamamai lawan Ongol sapanjang jalan. (gus)

loading...

BACA JUGA

Kamis, 10 September 2015 21:57

54 Calhaj Diminta Fokus Jalani Ibadah

<p>KASONGAN - Sebanyak 54 calon haji asal Kabupaten Katingan yang tergabung dalam kelompok terbang…
Sitemap
  • HOME
  • HOT NEWS
  • NEWS UPDATE
  • KOLOM
  • RAGAM INFO
  • INSPIRASI
  • FEATURE
  • OLAHRAGA
  • EKONOMI
Find Us
Copyright © 2016 PT Duta Prokal Multimedia | Terverifikasi Dewan Pers