SAMPIT | PANGKALANBUN | PALANGKA | KOTAWARINGIN | METROPOLIS | BARITO | GUMAS | DPRD SERUYAN
Minggu, 24 April 2016 21:18
Guring di Taksi

Si Ongol mandadak handak tulak ka Banjarmasin ada undangan gasan mandangani julaknya baulah panggung, ulih ada hajatan bakawinan. Ongol ne batulakan sakali ini umpat mobil  taksi travel. Inya tulak surangan, ulih bininya haur kada kawa maniggalakan rumah.

“Hati-hati bang lah di jalan, salam ja gasan julak, ulun kada kawa umpat ulih haur baharaguan di rumah,” ujar bini Ongol si Aluh Lintak sambil manjulung toples baisi makanan, pas lakinya bapamitan tulak di jemput lawan travel. Jangan kada ingat, makanan ngitu amun sampai palangka ja pian makan,” ujar bininya pulang.

Ongol ne pamaukkan urangnya amun  bajalan jauh lawan mubil. Amun lambat manginum obat anti mabuk bisa cagaran mauk tu pang di jalan. Tapi, sakali ini Ongol sudah maantisipasi, sabalum naik travel inya baistilah mauntal pil anti mabuk dua biji.

Apa ada, pas hanyar bajalan kaluar Kampung Liur travelnya, sudah kirip mata Ongol ne nang duduk di kursi tangah pas di balakang supir. Padang sayu matanya sampat ja inya batakun lawan panumpang lain dihiganya.

“Handak ka mana pian mang?” takun Ongol lawan urang nang pina tatuha pada inya di sabalah. “Aku handak ka banjar sanak ai, ada kaparluan,” sahut amang tu.

“Lawas kah lagi sampai ka Palangka lah?” ujar Ongol pulang sambil manguap. “Baluman lagi, sanak, lawas lagi,” sahut amang pulang.

Lalu badiam Ongol ni, pina takantuk banar sudah pinanya. Tapi sabalum inya taguring, samoat ha pulang batakun sakali lagi, lawan urang disabalahnya ngitu. “Parak sampai Palangka Kah?” jar Ongol sambil manguap. Rupanya amang saikung tu, paham amun si Ongol ne padang mangantuk. “Astaa, baluman lagi, ayuha ikam mun handak guring. Kena amun sampai kupadahi,” ujar amang tu manyahut.

Guringai si Ongol tadi di perjalanan. Sakalinya amang dihiganya tu taguring jua. Pas  masuk sampai Banjar, tabangun amang ngitu. Ongol maka masih taguring ja, ulih kabanyakan mamakan pil anti mabuk tadi.

“Pirr..pirr, kyapa dingsanak saikung nang guring ni??” inya handak ka Palangka, tapi aku taguring, kada ingat mamadahakan. Taliwatam,” ujar amang disabalah Ongol tadi.

“Aaiiiss..iyaam, nang kyapaam ni? Amun ditarusakan kalu pina inya ne kada baisi kaluarga di Banjar, aku kulir mambari makannya.!. Kyapa amun kit hantar ja ka Palangka? Hitung-hitung kita baamal. Satuju lah panumpaang barataan??” ujar supir maminta pandapat. “Satujuuuu…!” ujar panumpang nang jumlahnya baanam, baimbai manyahut.

Lalu travel tadi babulik ka Palangka, pas sudah sampai…”Sanak…uy sanak, bangunam. Nie sudah di Palangka nah..!” ujar amang tadi mambanguni Ongol, nang hayal guring mangaruk.

“Hah iyakah, sudaham kah di Palangka?” sahut Ongol sambil mambuka ka dalam tas maambil tuples sesanguan bininya nang baisi nasi wan iwak patin bapais. 

Apa ada, bingung amang nang tadi, mintu jua lawan supir sagalaan panumpang nang lain.

“Ikam ni handak ka mana garang sabujurnya?!” takun amang tadi lawan Ongol.

“Ulun ni, sabanarnya handak ka Banjar mandatangi kaluarga. Tapi pasan bini ulun tadi, mun sudah sampai ka Palangka jangan kada ingat makan, inya sudah manyangui ulun nasi,” ujar Ongol wan muha santai.

Mandangar nang kyitu, masam muha amang tadi tamasuk barataan panumpang travel tadi Supirnya mintu jua, nang sudah talanjur mambulikakan arah. Supir ni kada ingat jua lawan tujuan panumpangnya masing-masing, amun kada si panumpang nang bakuya pas sudah sampai.

“Waluh jua manusia saikung ngini..,” ujar amang manggarunumi Ongol.(gus)

loading...

BACA JUGA

Kamis, 10 September 2015 21:57

54 Calhaj Diminta Fokus Jalani Ibadah

<p>KASONGAN - Sebanyak 54 calon haji asal Kabupaten Katingan yang tergabung dalam kelompok terbang…
Sitemap
  • HOME
  • HOT NEWS
  • NEWS UPDATE
  • KOLOM
  • RAGAM INFO
  • INSPIRASI
  • FEATURE
  • OLAHRAGA
  • EKONOMI
Find Us
Copyright © 2016 PT Duta Prokal Multimedia | Terverifikasi Dewan Pers