SAMPIT | PANGKALANBUN | PALANGKA | KOTAWARINGIN | METROPOLIS | BARITO | GUMAS | DPRD SERUYAN
Senin, 25 April 2016 21:09
Makan Burung Puyuh

Si Anang Gabau nang rupanya lagi baulang tahun hari samalam mantraktir kakawanannya bubuhan Ongol, Lengkor wan Asoy makanan nang nyaman di rumah makan nang ada di tangah pasar Kampung Liur.

 “Aku sakali ini mambawai buhan kam makan iwak burung puyuh lah,” ujar Gabau rahatan di tangah jalan sambil mambawai buhannya mancari warung nang pas gasan singgah. “Barang ikam haja walai, amun iwak burung katuju jua aku mamakannya,” sahut Ongol kahimungan. “Aku mintu jua, manyasuaiakan ha salera lawan nang mantraktir,” ujar Asoy umpat manyahut nang diiyaakan jua oleh Lengkor.

Sakira satangah jam buhannya baampat tadi bakaliling pasar, akhirnya dapat jua warung makan nang manyadiakan menu masakan burung puyuh. Salain ada nang dimasak lalapan, ada jua nang dibanam wan ada jua nang dimasak kare.

 “Aku puyuh babanam ha,” ujar Ongol mandahului mamasan. “Aku puyuh bagureng ja, nang karing lah,” ujar Lengkor pulang. “Na..aku nang babanam ja jua,” ujar Asoy umpat jua mamasan. “Amun nang kyitu aku ulahakan burung puyuh spesial nang masak kare lah, biar lain pada nang lain,” ujar Gabau pas inya mamasan wan acil nang baisi warung.

“Cil, kawan ulun ne lagi ulang tahun, jadi pian sajiakan burungnya nang sigar lah, nang taganal, lawan nang hapuk dagingnya. Pokoknya menunya nang taharat pada nang biasanya,” ujar Ongol manambahi. “Naaa..sip tu cil, memang kawalan ulun ne paham wan selera kita,” sahut Gabau.

Pas sakira satangah jam labih, sudah tuntungam masakan burung puyuh nang dipasan bubuhannya tadi. Napa ada, lahap banarai lalu buhannya makanan, maka menu ampun Gabau pulang nang tabanyak wan taharum baunya, maulah selera makan buhannya batambah. Nangaran nasi ne sudahnya, sabakul surang.

“Nang kyapa wal, siip lah. Kanyangkah balum kah?,” ujar Gabau manakuni kakawalannya pas imbah tuntung makan. “Siip walai, pas banar rasanya sasuai kahandak liur,” sahut Ongol nang jua diumpati oleh Lengkor wan Asoy, sambil mausap bibir wan tissu. “Aku mintu jua nah, mantab banar masakan kare acil neh,” ujar Gabau jua.

Pas giliran babayar. Takajut takalipik si Gabau pas malihat nota nang dijulung acil warung tadi. “Akuiiii larangnyaaaa cil..!?,” barapa garang saikung harga burung puyuh ne, maka sampai lima ratus ribu kami makan baampat..!? ujar Gabau takakajut, sambil mahitung duit di dompetnya.

“Haau..maka jar buhan ikam jua tadi minta menunya nang taharat, lain pada nang lain. Kanapa maka larang, burung puyuh nang buhan kam makan tadi nitu memang pilihan kada sambarangan burung,” sahut Acil warung.

“Memangnya burung puyuh model napa nang kami makan ne cil..!?,” sahut Gabau panasaran sambil marangot. “Nitu burung puyuh nang biasa umpat lumba burung, wan rancak juara. Makanya spesial dari nang lain. Lakasi bayarii..,” sahut Acil Warung.

Napa ada, tamandam sambil marangot muha Gabau dapatnya sambil manjulung duit 500 ribu ka acil warung tadi. “Ni gara-gara ikam Ngolai, mamasan burung puyuh lain pada nang lain..!” ujarnya manggarunum manyariki Ongol. Bagaru ai dapatnya Ongol, Lengkor wan Asoy tadi sambil masing-masing manahan kurihing, malihat dompet Gabau tadi bungkas dapatnya. (gus)

loading...

BACA JUGA

Kamis, 10 September 2015 21:57

54 Calhaj Diminta Fokus Jalani Ibadah

<p>KASONGAN - Sebanyak 54 calon haji asal Kabupaten Katingan yang tergabung dalam kelompok terbang…
Sitemap
  • HOME
  • HOT NEWS
  • NEWS UPDATE
  • KOLOM
  • RAGAM INFO
  • INSPIRASI
  • FEATURE
  • OLAHRAGA
  • EKONOMI
Find Us
Copyright © 2016 PT Duta Prokal Multimedia | Terverifikasi Dewan Pers