SAMPIT | PANGKALANBUN | PALANGKA | KOTAWARINGIN | METROPOLIS | BARITO | GUMAS | DPRD SERUYAN
Kamis, 28 April 2016 21:27
Handak Jadi Ketua

Buhan warga Kampung Liur balakangan hari ne pina sibuk banar kasak-kusuk handak musyawarah  pamilihan katua ramaja masjid. Cara pamilihannya dipilih calon nang taharat bacaan sambahyang, wan fasih jadi imam sambahyang, wan bagus suaranya pas azan, dan yang pasti harus rajin maurus masjid.

Sakali ini nang mancalon jadi katua si Ongol, Anang Gabau wan si Lengkor. Haji Untat wan Haji Walet jadi juri  pemilihan ketua nitu tadi. Jadi sidin badua ni mambari pangarahan bagi bubuhannya nang handak mancalon jadi ketua ramaja masjid tadi.

“Kami badua baharap nang jadi katua kena harus rutin datang ka masjid, tarutama satiap sambahyang bajamaah. Jangan pangoler nang kaya salawas ini, haur aku wan Haji Walet ja nang rancak bajamaah pas sudah sambahyang subuh,” ujar Haji Untat mamasani buhannya.

Pas malamnya, sahari handak pamilihan. Haji Untat wan Haji Walet nang biasa lewat pos imbah sambahyang Isya bingung, malihat kadida saikung-ikung warga nang maronda. “Kamanaan lah bubuhan Ongol, sagalaan Gabau, Lengkor wan nang lain neh. Maka kadida mancungul lalu di pos. Maka biasa buhannya maronda,” garunum Haji Untat.

 “Yaam Ji ai, maka tadi, pas sambahyang Isya kadida jua mancungul di masjid. Nang kyapa buhannya neh, maka handak jadi katua ramaja masjid,” sahut Haji Walet nang umpat kabingungan jua.

Imbah itu, sakira jam ampat parak waktu sambahyang subuh. Haji Untat wan Haji Walet tadi baimbai pulang bajalan batis tulakan ka masjid handak sambahyang subuh.

“Pinanya ne ji ai, pacangan kita badua lagi nang azan wan bajamaah di masjid ne. Nang anum haur takalandau pulang amun sudah subuh ne. Kada kawa diharap jadi katua ramaja masjid buhannya neh,” ujar Haji Untat bamamai pas hanyar sampai masjid, oleh saikung-ikung kada mancungul buhan  Ongol, Gabau wan Lengkor.

Lalu badua tadi mambuka lawang masjid nang didalamnya masih kadap oleh lampu balum dihidupi. Haji untat bajalan ka parak wadah imam, salajur handak mahidupi lampu. Samantara Haji Walet, basiap handak mancatuk beduk mambanguni warga nyaman datangan ka masjid.

Sakalinya pas Haji Untat mamaraki katekan mahidupi lampu, timbul gugur sidin ne oleh tasandung. “Aduuh.!..napa ngini, ada nang mahalang..ujar sidin tajarungkup. Lalu hancap badiri sidin mahidupi lampu, sakalinya Ongol rahatan guring nang diranjah sidin tadi. Dihiganya ada Lengkor wan Gabau nang balampar jua guringan di parak wadah Imam urang sambahyang.

“Astagafirullahalaziim, maapa bubuhan ikam guring di sini hah. Untung kada kukuciaki maling tadi..! ujar Haji Untat bamamai. Padang mausap wan mata, manyahut si Gabau..”Anu ji ai, tapaksa urang ulun maumpati Ongol guringan di masjid, nyaman kada takalandau sambahyang subuh,” ujarnya kasasupanan. Lalu Ongol am tatuduh nang disambat mambawai guringan di masjid.

“Baniat manar buhan kam ne jadi katualah. Tapi kada ikhlas niat buhan kam neh, pas ada kahandak ja lalu hakun samalaman batunggu di masjid..!,” ujar Haji Untat pulang basasarek, sambil mahambat buhannya batiga tadi.

Napa ada, kalimbahannya, batatiga tadi dihukum manguras bak banyu gasan urang bawudhu nang sudah hibak lawan galadak. Tapaksaai padang mata kirip, takantuk-kantuk buhannya batiga manguras bak banyu nang isinya sama lawan lima drum nitu. Pamilihan katuanya maka, timbul ditunda oleh Haji Untat sampai ada nang bujur-bujur ikhlas hakun maurus masjid.(gus)

loading...

BACA JUGA

Kamis, 10 September 2015 21:57

54 Calhaj Diminta Fokus Jalani Ibadah

<p>KASONGAN - Sebanyak 54 calon haji asal Kabupaten Katingan yang tergabung dalam kelompok terbang…
Sitemap
  • HOME
  • HOT NEWS
  • NEWS UPDATE
  • KOLOM
  • RAGAM INFO
  • INSPIRASI
  • FEATURE
  • OLAHRAGA
  • EKONOMI
Find Us
Copyright © 2016 PT Duta Prokal Multimedia | Terverifikasi Dewan Pers