Buhan Ongol, Lengkor wan Asoy hari  rahatan rami mahadiri acara pesta  pelatikan ketua RT di Kampung Liur. Buhan panitia nang menyelenggaraakan pemilihan nitu, sangaja mandatangakan hiburan organ tunggal wan dua ikung artisnya. Maka artisnya ne bagincu tabal, rambut bapirang, babaju seksi pulang, pakai saikung pakai rok hendep, saikungnya babaju wan basalawar lepis nang kentat.

 “Tumatan mana yu artis nang dihangkut nitu lah, maka bagus banar suaranya. Mana seksi pulang urangnya,” ujar Asoy tanganga pas malihat biduan badua nitu tadi pas manyanyiakan lagu bajudul Jablay. “Yaam lah kada kalah jua lawan nang nangarannya Duo Serigala,” sahut Ongol wan Lengkor sambil handak umpat bajoget dangdut dihiga panggung.

Pas bubuhan Ongol rahatan asik bajoget lawan sagalaan warga nang hadir, timbul saikung biduan nang banyanyi tadi malapas lawan jaket, nang lalu baya mamakai baju tengtop, maka tangannya batato pulang, gambar kambang mawar warna habang hati, wan tangkainya nang baduri warna hijau tuha.

“Akuii..batato walai biduan ngini sakalinya..!,” ujar Lengkor manggawil Ongol sambil taparangah malihat. Napa ada malihat artis tadi makin wani tampil di panggung, batambah semangat buhan Ongol tadi bajoget.

Imbah itu si Lengkor giliran naik ka panggung dikawani Asoy, nang lalu handak umpat jua banyanyi lawan dua biduan tadi. Maka si Lengkor ne baistilah mangisir biduan nang babaju tengtop batatto kambang tadi. Samantara Ongol, umpat manyuraki ja di bawah panggung, gair kalu pina talihat bininya amun inya umpat jua banaik.

Pas baparakan lawan biduan nang batatto tadi, timbul mamanderi handak marayu si Lengkor wan Asoy ne kisahnya.

“Uuy ding bagus banar kambang nang ada di tangan pian nitu lah, mekar warna habang tapi baduri,” ujar Lengkor mambisiki lawan biduan tadi, sambil bajoget dihiganya. “Hahaha..bisa banar pian neh. Jangan dijapai bang lah, ada durinya. Kena pian tacucuk bisa luka,” sahut biduan nang dirayu Lengkor tadi.

“Aduuhai, padahal abang handak mamutiknya nah, gasan di tanam di pot kambang di muka rumah,” ujar Asoy pulang, umpat jua marayui. “Kada kawa diputik abang ai, bunga di tangan ulun neh akarnya manjalar panjang,” sahut biduan pulang, mahindar.

Rupanya tatap ja kada mau manyarah Lengkor wan Asoy marayu biduan nang batatto nitu tadi. “Amun abang boleh tahu, manjalar kamana akarnya ding, maka panjang banar ah?,” ujar Lengkor pulang.

“Naa bang akarnya, ayuha amun handak pian cabut..!,” ujar sang biduan tadi manyahuti, sambil maangkat tangannya tinggi-tinggi nang sakalinya, talihat bulu katiak sing labatan, kriting hirang. Maka masam pulang baunya, tahingut Lengkor wan Asoy.

Napa ada, hancap manukup hidung buhannya badua tadi, lalu hinip ampih lalu marayu biduan nang batatto tadi. Ongol nang malihati dibawah maka, tatawa  bahimat malihat kawalnya badua nitu, tahingut bau katiak biduan nang padang bapaluhan. (gus)