Wayahini lagi rahatannya marazia kandaraan bamotor nang kada lengkap surat manyuratnya. Tamasuk nang apabila dijalan kada manurut lawan rambu lalu lintas, nang kaya kada mamakai helm atau kada baisi SIM, napa lagi malanggar lampu merah.

 “Siang-siang kyini dari pada bamotor ka jalan raya pacangan kana razia,  baiknya kita ma es an ka warung Acil Jablay,” ujar Ongol mambawai Anang Gabau wan Lengkor pas takumpulan di pos ronda. “Yaam panas-panas kyini, jangan kan kita nang manusia. Kurasa hantu gin banaung dapatnya,” ujar Gabau pulang.

“Amun handak salamat dari razia, baiknya kita malalui jalan rantasan ha. Jangan jalan nang ganal, bisa hibak polisi bajagaan,” ujar Lengkor pulang. “Hiih, bujur ujar ikam Kor,” sahut Ongol.

Pas kabalujuran, asik buhannya batiga bakisahan, timbul lewat Haji Walet ba pik up mangawai bubuhannya. “Uuy..lajui kawarungan, ma es kita,”  ujar sidin malambai buhan Ongol.

Mandangar nang kyitu, napa ada hancap Gabau mahidupi motor tuhanya nang sudah batagar nitu. “Wayulaaah..! laju mandatangi amun sudah ada nang mantraktir,” ujar Ongol manyambati Gabau. “Haaa, amun sidin nang mambawai, pasti tajamin ditraktir urang. Amun nang ikam mambawai Ngol, pacangan bayar surang-surang dapatnya. Kurang-kurang maka, bisa tautang di warung,” sahut Gabau pulang.

“Ayuam amun nang kyitu, aku umpat jua babuat,” ujar Lengkor pulang. Lalu akhirnya buhannya bakajal batiga naik motor Gabau, maumpati Haji Walet ka warung Acil Jablay. Ongol tadi umpat jua babuat ka motor imbah dibawai Gabau. “Balindung di balakang pik ap sidin Nang, nyaman kada talihat polisi kita,” ujar Lengkor mamahadi Gabau.

Pas ditikungan nang parak manuju warung Acil Jablay, sakalinya ada razia mandadak bubuhan polisi. Napa ada, Gabau kada sampat lagiam handak mambelokakan motornya, lalu di stop buhan polisi nang marazia. “Baah..iyaam, razia jua dijalan nang halus ngini..!,” ujar Gabau takajut.

“Stop!..stop.!, matiakan motornya ka pinggir..!” ujar Polisi nang marazia buhannya. “Hah, kanapa pak, ada apa neh. Ada acara kah?” ujar Gabau papura kada tahu amun nitu razia. Ongol lawan Lengkor tadi, hinip jua kada sing bunyian. “Kalau ada petugas di tengah jalan raya, ya jelas namanya razia pak..!,” sahut polisi nang menyetop buhannya tadi.

“Mana keluarkan surat manyurat motor pian!,” ujar Polisi tadi mamanderi Gabau. “Anu pak ai, ulun kira buhan pian manjaga urang bakawinan atawa manjaga ada pajabat nang datang,” ujar Gabau pulang.

“Kami ni razia kelengkapan kandaraan, tolong pian kaluarkan surat manyurat motor dan SIM pian,” ujar Polisi pulang manyuruh Gabau. Untungnya Gabau ni mambawa ja lawan sagalaan STNK lawan sgala SIM, jadi lengkapnya surat manyuratnya.

Imbah itu, saikung polisi pulang mandatangi inya. “Kanapa bapak ini sampai bertiga naik motor?   Tidak pakai helm lagi..!,” ujar Polisi tadi bamamai. “Anu pak ai, urang ulun ne tapaksa ah bamutur batiga ni,” ujarnya.  “Haah tapaksa kanapa?” ujar polisi nang manakuni tadi. “ Tapaksa oleh kada muat baampat pak ai, urangnaya lamak barataan, jadi muatnya batiga ha,” sahut Gabau pulang. Mandangar nang kyitu mangalikik Ongol lawan Lengkor nang dibalakang. Polisi nang manakuni jua, umpat tamandam antara handak sarek lawan takarinyum.

“Amun kyitu bararti  kami tahan ja surat manyurat pian, kena dijulung amun sudah babayar dendanya,” ujar Polisi nang manilang tadi. Napa ada masam ai muha Gabau dapatnya, pas dijulung nota kena razia tadi. Tapaksaai batiga tadi, bajalan batis ka warung Acil Jablay.

“Ikam pang salah manyahut, lalu di tahan urang,” ujar Ongol mamanderi Gabau. “Kadanya gara-gara tasalah sahut pang, ngini gara-gara ikam nang mamaksa bakajal di motor.!,”sahut Gabau bamamai. (gus)