SAMPIT | PANGKALANBUN | PALANGKA | KOTAWARINGIN | METROPOLIS | BARITO | GUMAS | DPRD SERUYAN
Sabtu, 25 Juni 2016 11:56
Ayam Kentucky

Salah satu kawan akrab Ongol, yakni si Utuh Kalubut hanyar datang dari parantauan di kota ganal. Nangaran lawas hidup di kota ganal, pas bulik ka  kampung inya ni pina carewet makan. 

“Ngol warung nang bajual ayam kentucky adalah di pasar?,” takun Utuh pulang pina musti, kisah lawas hidup di kota ganal. “Ooh..ayam ras bagoreng nang batapung nitu kah? Iih adaai di pasar sana restorannya. Tapi kada manganyangi makan ayam nitu,” sahut Ongol pas buhannya takumpulan di pos ronda.  “Waduuh..berat jua liur ikam wayahini Tuh lah. Bacari makan gin nang kaya iklan di tipi jua iwaknya,” sahut Asoy pulang.

“Kadanya sumbungpang lawan buhan ikam lah. Aku tabiasa makan nangkyitu, ulih praktis walai. Kada lawas mahadanginya. Lawan nyaman jua rasanya, kada karas nang kaya ayam kampung,” ujar Utuh pulang kada mau kalah.

“Kami kada biasa lagi mamakan ayam nang ujar ikam tu. Kurasa larang harganya, mana nasinya sadikit ha pulang,” sahut Gabau pulang.  “Hahahaha..amun aku traktir pas buka puasa kena pang, hakunlah buhankam?,” ujar Utuh Kalubut manawari buhannya batiga tadi. “Naaa…amun nitu hakun banar Tuh ai,” ujar Asoy nang  langsung manyambar. Ongol wan Gabau umpat jua maiihakan.

Pas sakira satangah jam sabalum waktu buka puasa, buhannya baampat tadi  badapat di restoran nang khusus bajual ayam kentucky di pasar Kampung Liur. Ongol sampai baistilah mambawa kadutan plastik, nang kira-kira handak mambungkus gasan dibawa bulik. “Ayuu lakasi kita masukan. Langsung pesan makan ja di kasir nitu,” ujar Utuh Kalubut manyambut wan mambawai buhan Ongol, Asoy wan Gabau tadi ka dalam restoran.

Nangaran ditraktir urang, napa ada  batiga tadi langsung ha mamasan ayam masing-masing dua hiris. Untungnya si Utuh Kalubut ni banyak mambawa duit kulihan inya marantau di kota ganal. “Sadikit nasinya lah. Satangkup budas?,” ujar Asoy manggarunum, pas maambil ayam pesanannya. “Huss..jangan tapi nyaring. Makanya dua ikung ayamnya, nyaman kanyang,” sahut Gabau sambil babisik.

Imbah nitu lalu buhannya mancari wadah duduk, sambil mahadangi urang azan Magrib tanda  sampai waktunya babuka puasa. Sakira 10 menit buhannya mahadangi, lalu tiba waktu babuka puasa. Imbah badoa sagalaan babasuh tangan, langsung buhannya baampat tadi  lahap mamakan ayam kentucky nang baya bapalit sambal saos.

“Bah iyaam, habisam nasinya. Maka ayamnya sisa sahiris,” ujar Gabau manggarunum, pas rahatan buhannya makan. “Yaam aku jua nah. Paksaai mangipung ayamnya ja nih,” ujar Asoy pulang mayambung. Rahatan Gabau wan Asoy tadi kahabisan nasi, timbul Ongol ne mambuka lawan kadutan plastik nang dibawanya tadi.

“Tenang, aku mambawa persediaan. Handak kah buhan kam?,” sahut Ongol, sambil mambuka kadutan plastik nang sakali didalamnya rantang baisi nasi nang masih panas, maka wan ciduk nasinya pulang dihangkut. Rupanya Ongol ne sangaja basangu nasi matan rumah.

Napa ada, hancapai Asoy wan Gabau tadi manambah nasinya nang sudah habis badahulu, sampai mancubung di piring. Mintu jua Ongol, mancubung jua mangukut nasi sanguannya tadi, sampai akhirnya lingis sarantangan. “Ikam kada batambahkah Tuh?,” ujar Ongol sambil manawari Utuh Kalubut, nang tanganga kasasupanan malihat kalakuan buhannya batiga tadi. Maka ditatawai urang higa mahiga pulang, nang malihat kalakuan Ongol tadi. (gus)

loading...

BACA JUGA

Kamis, 10 September 2015 21:57

54 Calhaj Diminta Fokus Jalani Ibadah

<p>KASONGAN - Sebanyak 54 calon haji asal Kabupaten Katingan yang tergabung dalam kelompok terbang…
Sitemap
  • HOME
  • HOT NEWS
  • NEWS UPDATE
  • KOLOM
  • RAGAM INFO
  • INSPIRASI
  • FEATURE
  • OLAHRAGA
  • EKONOMI
Find Us
Copyright © 2016 PT Duta Prokal Multimedia | Terverifikasi Dewan Pers