Ongol wan Gabau tulakan ka Banjarmasin maantarakan Acil Jablay, wan Asoy nang handak bamudikan bulik ka tanah kaliharannya nitu. Buhannya tadi tulakan malam imbah buka puasa wan imbah bamagrib, naik bis tumatan tarminal.

Ulih karna rahatan bulan puasa, bis nang tulakan ka banjar tadi kada basinggahan paan ka warung makan. Kacuali pas diperjalanan sampai waktu urang basahur, hanyar sang supir bis hakun manyinggahakan ka warung makan. Jadi buhan Ongol ni diperkirakan basahur di jalan dahulu, sabalum bis tadi sampai ka tujuan.

“Buhan ikam basahuran kada? Amun basahur nyaman kita umpat basinggahan ka warung. Aku nang mambayari,” ujar Acil Jablay manawari bubuhannya. “Inggih cilai, kena mun sudah sampai warung banguni ha. Orang ulun basahuran,” sahut Ongol salajur mawakilakan kakawanan nang lainnya.

Sakira babarapa jam di perjalanan manuju ka banjar tadi, pas masuk waktu sahur. Supir bis tadi lalu manyinggahakan di warung makan nang lumayan ganal, wan lengkap menunya. Napa ada,   langsung nang kaya urang kalaparan tu pang buhannya baampat  tadi makanan.

“Ayuha makan sakanyangnya, buhan ikam. Amun ada nang sakit parut, hancap ka wc di balakang sana lah,  nyaman kada ma bom di dalam bis kena,” ujar Acil Jablay mamadahi buhan Ongol.

Pas mamasan makanan gasan sahur tadi, Ongol mamilih itik alabiu babanam, wan gangan asam kanas. Asoy kada mau kalah jua, inya mamasan katupat kandangan wan dua ikung iwak haruannya. Acil Jablay nang mambayari mamasan nasi kuning iwak hati. Samantara Gabau mamasan iwak patin bapais, lawan gangan waluh. Maka waluhnya singganalan pulang, pas banar nangitu gangan kasukaan inya.

“Akui  banyak waluhnya ni cil?” siip banar neh,” ujar Gabau manakuni lawan pelayan pas maantarinya makanan. “Yaam mangai, pas rahatan limbah panen  jua di kabun surang,” ujar acil warung manyahut.

Buhannya baampat tadi, gancang banar makan. Ongol nang badahulu habis, limbah nitu si Asoy, Acil Jablay, lalu nang tarakhir si Anang Gabau.

---------- SPLIT TEXT ----------

“Nang kami badahulu lah naikan ka bis, ayuha ikam habisakan dahulu bamakanan, baluman jua lagi bisnya tulakan. Imsyak masih talawas,’ ujar Acil Jablay.

Gabau ni rupanya paling tadudi makan, wan urang nang paling tarakhir babulik ka bis, nang handak malanjutakan perjalanan. “Tiit...Tiiitt,” bunyi bis mangode handak tulakan pulang. Rupanya Gabau ni hanyar ja limbah tuntung makan. Napa ada bahancap inya bajalan masuk ka dalam bis, limbah mambasuh tangan.

Tapi , pas inya mancungul ka dalam bis hibak takarinyum panumpang nang lain malihat inya. Maka ada nang model batutup hidung pulang, sampai maulah si Gabau saraba salah pas bajalan malalui wadah duduk panumpang nang lain.

Ongol, Asoy wan Acil Jablay mintu jua, pina kurahang kurihing manatawaakan si Gabau. Tambah kabingungan Gabau dapatnya. “Napa garang buhan ikam nih, maka mangurihing malihati aku..!?” ujar Gabau panasaran.

“Kada papa ai ah. Amunikam handak tahu, cuba ikam duduk parak supir di muka sana. Lihati ka kaca spion,” ujar Asoy manyuruh Gabau. Lalu majuai, Gabau tadi kamuka mandantangi kaca spion.  Alangkah takajut kasasupanan si Gabau pas bacaramin di spion tadi, sakalinya di sesengotnya nang tabal ngitu sangkut sisa gangan waluh nang dimakannya tadi. Maka warnyanya kuning malentang pulang, nang kayapa kada tatawaan urang malihati muhanya. Rupanya si Gabau ni kada ingat lagiam malap muntung lawan tissu imbah makan, saking bahahancap babulik ka dalam bis.

“Waluh juaa, salang tabarikit di sesengot,” garunum Gabau dalam hati, maharit supan, wan mamusut sesengotnya nang belepak sisa waluh tadi, pakai karah baju.(gus)