SAMPIT | PANGKALANBUN | PALANGKA | KOTAWARINGIN | METROPOLIS | BARITO | GUMAS | DPRD SERUYAN
Selasa, 08 November 2016 15:32
Pasar Malam

Di Kampung Liur lagi rami ada pasar malam. Sakali ini pasar malamnya tabanyak  urang nang bajualan baju, salawar baobral mulai nang merek lepis, salawar kolor, sampai salawar sempak alias cancut.

”Aku dangar-dangar lagi ada cuci gudang jar Ngol ai, makanya banyak barang nang diobral di pasar malam ngitu. Ayukah kita kasanaan, aku pas banar handak bacari salawar,” ujar Anang Gabau mambawai Ongol.“Iih aku jua, handak balalihat salawar nang model hanyar,” sahut Ongol basumangat.

 “Aku umpat jua, ampunku banyak nang masih baal bajamur, makanya handak jua manukar salawar nang tahanyar,” ujar Lengkor mandatangi Ongol wan Gabau pas buhannya badapatan di pos ronda.

Lalu buhannya batiga tadi tulak kapasar malam nang lokasinya pas di lapangan bula Kampung Liur.  Asik bajalan di tangah pasar Ongol, Gabau lawan Lengkor tadi, kada paduli paan batis padang licak. Maklumja nangarannya pasar di tangah kampung, buhan padagangnya pakai tenda Misbar ja, alias amun kana garimis lalu bubar.

“Tuu inya Ngol, pinanya wadah urang nang  maubral salawar. Akuii raminya urang mahurungnya, maka hibak acil-acil barataan nah,” ujar Lengkor, pas malihat lapak urang bajual sempak sakalinya nang diparaki buhannya tadi.  Maska warna-warni pulang sempaknya, dipajang urang wan patung nang basusun rapi. 

Pas buhannya baparak, lalu bingung,  sakalinya nang dipajang di patung tadi   salawar sempak babinian. Rata-rata sa set lawan beha nya. Tapi buhan Ongol batiga tatap ja manjuju masuk umpat bakajal. “Kalo pina salawar lalakian di dalam andakannya,” ujar Ongol mambawai kakawanannya tadi masuk bakajal.

Gabau wan Lengkor pina himung jua dibawai masuk bakajal ka dalam kios nang hibak bebiniannya nitu. “Amun malihat mudelnya ne, mantab-mantab pang lah,  mana warnanya pina banyala lagi, ada nang barenda tambus pandang,” ujar Gabau babisik sambil mangilik tatawa.

Kanapah pas Ongol asik maitihi sempak nang warna-warni tadi,  tiba-tiba talinganya sabalah kanan ada nang manarik. “Aduuh..akaaii...akaii..! siapa garang nih..! ujar Ongol sambil manjapai tangan nang manarik talinganya.

Pas Ongol bapaling, sakalinya bininya sorang nang manarik talinganya. “Apa nang pian itihi bahimat disini !, maka ujar pian handak bacari salawar lepis, kanapa pian timbul kamari bukahnya..!,” ujar Bini Ongol si Aluh Lintak bamamai wan lakinya nitu di tangah urang banyak.

Gabau lawan Lengkor nang tadinya parak, bahancap bukahan bajauh pas malihat ada bini Ongol bamamai, gaer kalu pina umpat disalahakan.

“Anu..anu dingai, abang tadi tasalah lihat, laluai tasalah masuk. Abang kira urang bajual salawar lalakiannya di dalam. Kada bapajang di luar. Ni abang sambil jua bacari sempak lalakian, kada sing dapatanja dari tadi,” sahut Ongol mambela diri.

“Alaah..! dasar alasan pian haja, kadidapaan  urang bajual sempak lalakian bapajang. Nang dipajang ni khusus bajual pakakas gasan babinian ja. Bulik ha sana pian, biar ulun kena nang mancariakan salawar gasan pian! ujar bini sambil mancelengi lakinya.

“Iihaai, aku bulik haa. Kada adil jua nang bajualan ne, ampun babinian ja nang ditampaiakan sakalinya. Salawar ampun lalakian disuhuk !,” ujar Ongol manggarunum sambil malurung bulik manyasahi Gabau wan Lengkor, nang malihatinya dari jauh sambil mangalikik tatawa. (gus) 


BACA JUGA

Kamis, 10 September 2015 21:57

54 Calhaj Diminta Fokus Jalani Ibadah

<p>KASONGAN - Sebanyak 54 calon haji asal Kabupaten Katingan yang tergabung dalam kelompok terbang…
Sitemap
  • HOME
  • HOT NEWS
  • NEWS UPDATE
  • KOLOM
  • RAGAM INFO
  • INSPIRASI
  • FEATURE
  • OLAHRAGA
  • EKONOMI
Find Us
Copyright © 2016 PT Duta Prokal Multimedia | Terverifikasi Dewan Pers