Dalam samingguan ni warga Kampung Liur pina resah pulang lawan aksi maling nang mulai manjadi-jadi lantaran listrik haur bapajahan ja kada tahu waktu. Karancakan listrik pajah pas rahatan limbah habis Isya sampai lewat tangah malam.

“Talalu banar bubuhan nang baisi pabrik listrik ni Ngol lah, mamajahakan kada baingat, sakahandaknya. Maka pas rahatan kadap samalam, ayamku nang dikandang balakang rumah, hilang dua ikung. Maka dua hari baturut-turut kajadian tuh, pas rahatan mati lampu pulang,” ujar Haji Untat bagarunum, pas bubuhan Ongol takumpulan di pos ronda.

“Iyaam Ji ai, nang kaya malam ini nah, pajah kada bahabaran listrik neh. Tapaksa maulah kita kada kawa lengah kalu pina maling maraja lela pulang. Maka hari haur hujan marimis ja pulang,” ujar Anang Gabau pulang manyambung pander.

“Nang kyapaam lagi amun sudah kyini kaadaannya, handak minta bela lawan siapa pulang kita nang rakyat biasa ngini. Dinikmati ai sudah, kita jaga rumah wan kampung kita masing-masing ja, nyaman kada dimasuki maling pas rahatan kadap kada balistrik,” ujar Ongol manyahut.

“Aku jaka batatangga lawan nang kapala pabrik listrik ngitu, bisa ku sontol. Pacangan rugi usaha kita dapatnya, gara-gara listrik haur pajah. Amun giliran babayar maka, handak lakas ja tarus,” ujar Haji Walet pulang bamamai.

Kada lawas buhannya bakisah lalu datang Lengkor. Bakpiah tahereng, lengkap mambawa sintar anam batrai, pangkungan kayu, lawan parang laduk basarung diekat dipinggang.

“Dasar nang kaya jagauan ikam Kor nang kyitu datang ka pos ronda. Aku jadi taingat kisah pandekar si Pitung nang dari Batawi tu nah. Bisa gagan maling masuk kampung kita neh, amun nang ikam tukang jaganya,” ujar Ongol maambungi Lengkor.

“Pokoknya ulun siap maamanakan kampung dari sagala gangguan kaamanan. Apalagi baya maling ja, ulun lincai tu pang lawan pangkungan ne,” ujar Lengkor pina nahap, sambil manuang kupi wan manjumput gumbili bajarang.

“Apa garang nang ikam baisi Kor, maka wani maamanakan kampung kita neh,” ujar Anang Gabau marasa tapanasi.

“Haww..aku ne biasa marantau salajur baguru. Ya paling kada adahaja lah dua tiga jurus andalan ku gasan malumpuhakan maling,” sahut Lengkor.

“Sudah-sudah, dari pada buhan ikam batangkar, ada baiknya bubuhan ikam sama-sama awas manjaga kampung ne, jangan handak harat masing-masing,” ujar Haji Untat manuhai, managur Lengkor wan Gabau.

Rupanya Haji Untat tadi, handak bulik badahulu ulih sudah faktor usia jadi sidin kada kawa lawas takana angin malam.

Kanapakah pas rahatan sidin hanyar ampat langkah maninggalakan pos, timbul garabakan buhan Lengkor lawan Gabau tadi, nang kaya urang mangaluarakan jurus. Maka sagalaan Ongol lawan Haji Walet nang asik bacatur umpat jua taluncat ka tanah, malihat Lengkor pina garabakan badiri model urang manangkis mangaluarakan jurus.

“Haw..haww..kanapa neh..! apa nginii...! ujar Lengkor babunyi surangan. Gabau umpat jua badiri basiap lawan jurus, sampai tanganga Haji Untat kadi jadi bulik malihat buhannya galabakan kyitu.

“Kuurrr..samangat...kuurrr samangat,” ujar Lengkor pulang.

Sakalinya, pas rahatan asik bakisah tadi. Lengkor ni takipik, takibar samangatnya akibat ada cacak  nang gugur masuk kadalam bajunya. Makanya sampai galabakan badiri mangaluarakan, sampai tasipaknya cangkir banyu kupi inya surang.

Malihat nang kyitu, lucut tatawaan bubuhan Ongol manampalaki Lengkor. “Pina harat sagalaan baisi jurus, wani maamanakan kampung dari maling, diguguri cacak nang halus ngitu ja, sampai takalipik, takibar samangat. Tabalik cangkir ikam sepak..hahaha,” ujar Ongol.(gus)