Bila bubuhan Ongol, Gabau wan Lengkor bahulutan wan basambatan, pasti nang paling rancak kana hapaki adalah si Lengkor. Ulih si Lengkor ni makannya paling gancang kada baingat wan urang, hantup sana, sulum sini, apa haja dibantasnya. Biasa suatu hari, bubuhannya batiga tadi basambatan sampai hapak lalu si Lengkor kakalahan gawi Ongol.

“Ampun maaflah Kor, manurut kasihatan bahwa urang sihat itu awaknya nurmal, kada lamak dan kada kurus. Awak ikam itu kulihat lamaknya balalabihan, ujar Gabau, mulai mahuluti Lengkor pas buhannya dudukan di pos ronda Kampung Liur. “Biarpun awakku lamak tapi nyatanya aku sihat-sihat haja, kada bapanyakitan,” sahut Lengkor malawan.

Bujur haja wayahini sihat dan sigar bugar, tapi awak ikam itu rawan panyakit, kabanyakan lamak, kabanyakan gula, kabanyakan uyah, kabanyan minyak, bisa asam urat, bisa panyakit kancing manis, lawan bisa bapanyakit jantung wan darah tanggi, ujar Gabau nang makin gancang manyambati Lengkor.

Aku sapandapat wan Gabau itu Kor ai, karna itu sasuai palajaran di sakulah bahari,”ujar Ongol umpat manyahut.  “Awak lamak ini adalah tandanya urang makmur dan hidup sajahtera, lawan sabaliknya awak kurus kurisaan tandanya hidup malarat. “Parut lamak artinya kada kurang makan,sebab parut hibak tarus,” ujar Lengkor mambalas sesambatan Gabau.

“Kamakmuran lawan kasajahteraan itu jangan diukur wan parut nang buncit kaya parut ikam itu Kor ai. Cuba ikam itihi urang-urang sugih itu parutnya biasa haja, banyak duit wan hidupnya nyaman. Kada parlu buncit kaya parut ikam, ujar Gabau kada mau kalah.

Rupanya Lengkor ni, kada mau kalah sakali ini basambatan lawan Gabau. Manyahut tarus tu pang kisahnya. “Kalu kada diukur wan parut lalu siapa diantara kita batiga ini nang paling makmur, ujar Lengkor pulang.

“Amun  manurut aku, nang paling makmur diantara kita ini adalah si Ongol, ujar Gabau manunjuk Ongol. “Ikam marasa lah hidupkam makmur wan sajahtera Ngol, padahal parut ikam kempes, pinggang halus, salawar rancak ja taluluy ulih parut kempes,” ujar Lengkor manakuni Ongol.

“Hahaha..hidup makmur wan sajahteraku kada kalihatan di parut nang ganal pang,  tapi talihat pada buritku nang ganal, ujar Lengkor sambil manapuk-napuk buritnya.

“Haah, napa kyitu. Aneh bin ajaib alasan ikam ne Ngol ai, kada masuk diakal amun burit taganal nang dijadiakan ukuran hidup nyaman wan sajahtera,” ujar Lengkor manangkar pulang.

“Ikam tu kada paham lawan nang dimaksud Ongol tu. Ayo Ngol buktiakan,” ujar Gabau mangode lawan Ongol, supaya mangalahakan Lengkor.

“Ikam tahulah Kor burit nang kutapuk ini, kancang kalo? Cuba kam japai. Kadua balah burit antangan kantung salawar ku ni gambung. Itu artinya di dalam kadua kantung salawarku ni ada dumpet wan didalamnya ada isinya,” ujar Ongol sambil mangaluarakan dumpetnya wan manampaiakan duit  saribuan bagumpal bagulung.

Apa ada malihat isi dumpet Ongol, kalakakan tatawa Gabau. Lengkor makam, pina mandam kada kawa manangkar am. Apa pas diminta Ongol manampaiakan isi dumpetnya, sakalinya baya ada dua tiga lambar duit ribuan ja, lawasn kartas baisi rumusan numur buntut.

“OooH…….. hanyar aku paham Ngol  ai, biaram parut ikam kimpis lah,  tapi dumpet diburit nang kancang wan manggalambung,” ujar Lengkor manggarunum kakalahan. (gus)