Ongol nang bawarungan di muka rumahnya, akhir-akhir ini rami didatangai kakanakan sakulah SMP nang taparak lawan wadahnya bajualan, tarutama pas jam istirahat. Rupanya ada panambahan jam balajar, nang maulah kakanakan sakulah bulik sampai lewat pada tangah hari. Biasanya kakanakan bulik sakulah jam 12 siang, dalam barapa hari tarakhir ini, buhannya bulikan sampai jam 2 siang, jadi jam 12 hanyar istirahat ja.

Warung Ongol nang saban hari dijagai bininya si Aluh Lintak bajual macam-macam makanan ringan sampai nang barat. Banyak kakanakan sakulah ni bila istirahat ka warung  Ongol ni, tapi nang paling payu jualannya yakni mie bakuhup. Ulih makanan ngitu bisa manganyangi kakanakan sakulah, wan harganya tajangkau sasuai jatah duit sangu bubuhannya.

Saking raminya, kakanakan sakulah mamasan mie, saban hari paling kada sa kardus labih habis mie nang dikuhup di warung Ongol tu. Maka pas rahatan kakanakan rami mamasan mie, bilangan haur banar si Ongol wan bininya manguhupakan mie, handak kada katanganan ulih barabut kakanakan mamasan.

Maka sudah ja Ongol wan bininya ne, manaikakan harga mie nang biasanya sabungkus Rp2000 jadi Rp 3000, ulih handak maambil untung singganalan. Ya tatap haja, kakanakan barabut manukarnya.

“Amun nang kaya ini lucut kita bah ai, bisa kada katanganan saking racapnya kakanan mamasan mie, pas istirahat,” ujar si Aluh Lintak manggarunum kauyuhan.

“Imbah pang, kyapaam lagi. Ngarannya ja usaha surang, dijalaniai lagi ding ai,” sahut Ongol wan bininya.

“Kyapa bah, amun kita maupah pambantu ja sudah gasan mandangani manguhup mie di warung nah, nyaman pacangan lakas kita manggawinya pas kakanakan racap datang,’ ujar bini Ongol mausul.

“Janganam dingai, sayang duit kita maupah urang pulang. Abang rasa kawa ja kita manggawinya baduaan,” ujar Ongol.

“Kyini ja nah, kayapa amun parak bubuhannya istirahat kita kuhupi ja mi nya babanyak, jadi tinggal surung ja lagi pas buhannya datangan,” ujar Ongol pulang mambari solusi.

“Bujur jua bah ai, cardas jua pian ne lah,” ujar Aluh Lintak mamuji lakinya.

Isuk harinya, pas parak jam sakulahan istirahat, langsung ai Ongol wan bininya manguhupi mie sa kardusan. Baistilah dua laki bini manatai mangkuk babaris dimeja, baisi mie nang sudah dikuhup lawan banyu panas.

Sakalinya tadangar sampai ka warung bunyi luncing pina talawas pada nang biasanya. Iiiih, sakalinya luncing tadi tanda kakanakan sakulah bulikan, pas buhannya ada ulangan jadi tasungsung bulik, sabalum jam 12.

“Jiaahh bulikan kah sakalinya kakanakan. Nah iyaam, labar am, barugiaam amun kyini mudelnya. Bahujung Mie bangkak ja sakardusan ai kisahnya neh,” garunum Ongol lawan muha nang marangot campur masam.

Bininya si Aluh Lintak maka, makin masam lagi muha wan bamamai manyalahakan nang laki. “Rugi kita bah ai, gara-gara tasalah prediksi pian neh. Tu nah siapaam lagi mamakannya mie nang sudah bangkak sakardusan,!” ujar bini Ongol bamamai.(gus)