Ongol wan Dangdut lagi asik bakisahan di warung Acil Jablay, sambil mangupi wan bacatur. Nang ampun warung, pina asik jua sambil manonton film india. Sampai wayahini sidin bahias gin maumpati model urang India, calak wan gincu batabal, lawan umpat jua bapandir sambil bagiling kapala.
“Akuii acil lah, hanyar katuju manuntun India sudaham nang kaya urang India jua. Napa lagi amun sampai pian bajualan di India sana, bisa taubaham selera,” ujar Dangdut manggayai Acil Jablay. “Wayahini lagi musim Ngolai, harap maklum ja ikam. Tu nah di pasar hibak urang bajual baju dari India,” sahut Acil Jablay.
Imbah nitu datang si Anang Gabau pulang ka warung. Gabau ne rupanya manampaiakan baju kaosnya nang hanyar, bagambar iwak bakapala singa, nang mancuratakan banyu dari muntungnya.
“Akai..baju hanyar kawal nah, kadida urang bajual pinanya di wadah kita neh..?” ujar Dangdut managur Gabau. “Yaam ah, baju tatukaran marina ku, imbah bulik bajalanan dari Singapur,” sahut Gabau, wan muha pina nahap.
“Beeuuhh, sugih pang marina ikam wal ah, maka bajalanan sampai ka Singapur, manukarakan baju pulang lawan ikam,” ujar Dangdut pulang. “Tahun lalu sidin bulik matan Thailand, manukarakan aku sapatu, maka kadida jua urang nang bajual diwadah kita neh,” ujar Gabau pulang.
Mandangar kisah Gabau tadi, panas Ongol ne rupanya. “Sama nang kaya aku jua, barapa kali kah sudah mintuha ku manukarakan aku baju sampai sagalaan sandal dari luar negeri sana,” ujar Ongol manyahuti pandiran buhannya tadi.
“Mananya kaosnya Ngol, maka kada ikam pakai,” sahut Gabau. “Hari ini kabujuran lagi dijamur biniku, jadi aku mamakai baju tukaran pasar Kampung Liur ha. Isukai, ku malihatakan ka buhan ikam,” ujar Ongol pulang.
Kaisukan harinya, buhannya batiga tadi badapat pulang di warung Acil Jablay. Si Gabau datang mamakai baju bagambar gajah nang ditukarakan marinanya dari Thailand. Mintu jua wan sandalnya, tatukaran Singapur. Mintu jua lawan Ongol, datang basandal karet wan babaju kaos warna putih polos, tipis, tangan hendep.
“Na Ngol baju ku nang ditukarakan marina ku dari Thailand tu,” ujar Gabau badahulu maagaki. “Ngini pang baju nang jarku dari luar negeri, ditukarakan mintuhaku,” sahut Ongol kada mau kalah. “Haau..mana maka kada bagambar Ngol. Nang kyapa kami parcaya amun baju ikam nitu dibawa dari luar negeri sana,” ujar Dangdut managur. Mandangar nang kyitu lalu mamaculai Ongol wan bajunya tadi. “Amun buhan ikam kada percaya, na cuba lihati diantangan lehernya ne, dari mana asalnya..!” sahut Ongol.
Pas dilihati Gabau wan Dangdut, sakali tulisannya “Made In China “Amun kurang bukti, ni nah kam lihati dibalik sandalku, ulahan luar negeri jua,” sambil Ongol manampaiakan tulisan “Made In Taiwan”. “Ampun aku iya jua, sarudung wan gincu ku ulahan India. Nah, ada tulisannya “Made In India,” ujar Acil Jablay umpat bagabung.
“Jadi kadanya baju ikam ja Nangai, nang dari luar negeri, ampun kami gin barataan banyak ulahan luar negeri jua,” ujar Ongol mahapaki Gabau. Napa ada, hinip lalu Gabau kada sing bunyian dapatnya, kakalahan. (gus)
