Pas hari pada rahatan panasnya, datang bubuhan Ongol, Lengkor wan Dangdut mawarungan wadah Acil Jablay. Maka pas banar di warung ngitu ada babinian badua ikung nang tapalar bungasnya.  Malihat ngitu, paragah bacari parhatian ai pulang si Lengkor wan Dangdut nang kabalujuran salawas ni kada sing payuan lagi alias jumblu.

“Ehhmm.. Cil es nyiur tiga lah, amun ada nang handak batambah ayuha julungakan,” ujar Dangdut mamasan es lawan Acil Jablay, salajur manajak pangaruh alias manyeret lawan dua ikung babinian tadi. Ongol lawan Lengkor kada mau kalah, sambil maambil wadah baduduk, muha pina mangarinyum lawan mata pina selek-selek jua, sasatumat maitihi ka muha urang nang bungas tadi.

“Nah iyaam, esnya ni adanya ja, nyiurnya nang habis. Kacuali buhan ikam hakun manaiki pohon nang dihadapan ni nah, tabanyak buahnya. Ayuha amun buhan kam hakun maambilakan nyiur aku garatisakan,” ujar Acil Jablay manawari buhan Ongol.

Mandangar nang kyitu, hancak manyahut si Lengkor. Inya untung, ulih awaknya surang nang takurus. Samantara Ongol lawan Dangdut parut sudah manggalember lamak, jadi barat amun dibawa naik nyiur. “Ayuhaa, ulun nang manaikinya lah. “Ngol buhan ikam jagai buahnya di bawah lah,” ujar Lengkor basumangat, apa kaahliannya banaik pohon pacangan dilihati babinian badua tadi eh.

“Bang..ulun minta lah gasan dibungkus mambawa bulik ka rumah,” ujar binian  nang saikung manyahut.

Apa ada, mandangar babinian bungas tadi managur, makin takibar samangat Lengkor, langsung mamacul lawan baju mamaraki batang pohon nyiur nang handak dinaikinya. “Ayuhaa ding ai, kada usah ikam nang mambungkus. Abang rela haja maantarakan sampai ka rumah hehehe,” ujar Lengkor takarinyum kahimungan, langsung mamagot lawan batang nyiur nang dinaikinya. “Manang aku sa set, pada Dandut,” ujarnya dalam hati.

Lengkor basiap naik ka puhun nyiur. Nang lain mahadanghi di bawah. Bajunya di lapas, babaju singlit ja, salawar panjang di lapas,tatinggal salawar kadut kain galapung ja lagi nang di pakai Lengkor nih,supaya taringan jua sadikit manaiki puhun nyiur tadi.

“Bagagimit Bang’ai, kada usah badadas gin,” ujar binian saikung nang handak mambungkus buah nyiur tadi.

“Tanang haja pian ding’ai, sual naik-manaiki ni  abang pang dah nang paharatnya di Kampung Liur ni, hehehe,” ujar Lengkor makin basumangat banaik.

Hhaap…!!! Braakkk…!!! Naik ai Lengkor  ni tadi, pina samangat banar nih kisahnya,kada tahu lagi padang balahan salawar rabit. Maka takana Lengkor ni kada basimpak  pulang. Maka samakin bagarak ka atas, samakin ganal rabitnya.

Apa ada nang manunggu di bawah ni,  pas ta’itihi jua lawan salawar Lengkor nang rabit tadi. Rami ai, buhannya baucap.

Aaaa…baang..!! kalihataaan..!!” ujar nang babinian di bawah bakuciakan. “Hiih parak ai kalihatan dah buah nyiurnya nah, tanang ja buhan pian di bawah,” sahut Lengkor.

Brakk..!! baganal rabitnya..”Nah kalihatan batangnya Bang’ai ” ujar nang di bawah. “Hiih ni pang nah lagi di ragap batangnya ” ujar Lengkor  nang balum sadar lagi amun salawarnya rabit. Bubuhan Ongol, Lengkor lawan sagalaan Acil Jablay ni, sudahnya handak takamih tatawaan, malihat  salawar Lengkor ne rabit.

 “Umaa’ ai..biginya kalihatan Kor ai..!?” ujar Acil Jablay umpat bakuciak. “Haii..dua bigi kah nang diputik,” ujar Lengkor nang sudah sampai atas, sudah mahadap tinggal mamutik ja lagi.

Ngarannya di atas puhun, angin tarasa banar darasnya. “Aiii..rasa dingin burit, kanapa nih ??,” ujar Lengkor bingung wan mahahar ka burit. Babaya imbah manjapai,sakalinya sing luasan rabitnya. Apa ada langsung mandusur inya turun kada jadi mamutik nyiur nang dua bigi tadi. Sampai di bawah mandam saribu bahasa Lengkor , mana muha habang pulang saking kasasupanan. Apa nang pakakas sampat talihat pamirsa dari bawah, rahatan inya banaik nyiur.

Ongol wan Dangdut maka tatawa mangalakak kada kawa lagiam maharit ta. Nang binian bungas badua tadi mintu jua, sagalaan Acil Jablay bahimat jua tatawa, ulih kada kawa lagi ditahan. (gus)