Bubuhan Kampung Kadap malam tadi kada mau katinggalan jua lawan urang nang rami manonton balapan grand prix. Antara Ongol, Anang Gabau, Lengkor, Dangdut lawan Asoy baisi jagoan masing-masing.

Tapi gara-gara lampu pajah di Kampung Kadap, tapakasa bubuhan Ongol tulakan manontonan ka Kampung Liur, nang kabalujuran manajak layar tancap nonton basamaan di halaman rumah pambakalnya. Buhannya tulak baimbai, mamakai mobil colt marinanya si Gabau.

“Jagoan ku amang Eros tu pang pokoknya, alias Rossi. Pambalap nang paling tangguh kajiannya,” ujar Ongol. “Amun aku Marques walai, inya nang paling babakat pas kutonton salawas ini,”sahut Gabau kada mau kalah.

“Tapi aku yakin nang cagaran juara umumnya si Lorenjo. Apa kandaraannya lancing babanaran, alhan nang kaya ditawak ja lagi lajunya,” ujar Dangdut, nang sama idolanya lawan sagalaan Asoy wan Lengkor.

Sakira handak dua jam an bubuhan Ongol tadi manonton babalapan. Sampai rasa umpat gadagupan jua jantung bubuhannya malihat pambalap baaksi. Ada nang sampai manikung santuk lintuhut ka aspal, sampai jar Ongol, ada nang manikung sampuk siku ka aspal, lawan handak jua sampuk kupingnya ka aspal, alias tadangsar saking kalajuannya.

“Apa ujar ku, Lorenjo jua kalo nang manang. Aku yakin kajiannya taharat pada nang lain, jadi kawa tambus juara,” ujar Dangdut mamanasi. “Bah…uli amang Eros kurang jamunya ai, jakanya taimbai startnya, kalah juaai pambalap jagauan ikam ngitu,” sahut Ongol kada mau kalah.

Limbah tuntung manonton, lalu buhannya bulikan. Asoy nang manyupir sakali ini. Jalur bulik bubuhannya ka Kampung Kadap malalui jalan raya, pas taimbaian jua lawan panonto nang lain.

“Uuy Soy, bagemet ja lah, jangan tapi laju. Banyak kakanakan bakabutan di jalan kalu pina tarancah kena, limpak mobil marina ku,” ujar Gabau maingatakan Asoy.

Pas juaai, sampai dijalan nang lurus. Buhannya diselip ulih kakanakan nang lagi bakabutan, alias lagi umpat balap liar. “Kurang ajar banar, kakanan nang mangabut ngitu, rasa jalan ampun padatuannya kalo..!, mana pina musti balukup batatungging pulang burit,” nang kaya amang Eros jua neh,” ujar Asoy manyumpah.

Marasa tapanasi, lalu manggas bahimat si Asoy tadi lawan mobil nang disupirinya handak manyasah kakanakan nang mambalap buhannya tadi. “ Dasar laju banar ih, kakanakan ngitu bamotor, kada kawa kita manyasahnya. Maka ditatungginya pulang kita nah,” garunum Asoy. Nang lain maka umpat tapanasi jua sagalaan si Ongol wan Gabau, umpat jua manyamangati si Asoy.

Kada lawas. Nguuuuung……!” sabuting pulang kakanakan bamotor balukup, mambalap buhannya, sambil mamainakan gas motor nang suaranya maraung.

Tapanasi pulang si Asoy lawan sagalaan Ongol. “Kurang ajar banar kakanakan ngitu lah, makin manjadi balalajuan di jalan sakahandaknya,” ujar Ongol umpat bamamai, sambil baingkut pisit di kursi balakang.

“Ayuuu kita balukupan, nyaman kada tatampuh angin, jadi kawa mambalap bubuhannya..!” ujar Asoy bakuciak. Apa ada, ngaran tahayal babalapan limbah manonton gran prix tadi, hakun jua rupanya si Gabau, wan Ongol sagalaan Lengkor, Dangdut umpat balukup.

Nyuuussss…. Balaju mobil buhannya, sampai akhirnya kawa mambalap kakanakan nang bakabutan di jalan tadi. “Naa…inya dapatku jua akhirnya manyasah. Kalah jua inya limbah kita sabarataan balukup manggas kandaraan. Inya surangan ja balukup, kita ba lima,” ujar Asoy kahimungan.

“Baborean ikam Soy, padahal kadida hubungannya paan, handak kita balukup kah kada kah, tatapai tagantung kawanian ikam jua nang manjajak gas,” ujar Gabau sadar mun taumpat gawian bubungulan Asoy, yaitu mahayal babalapan. (gus)