Di antara kakawanan bubuhan Ongol ne ada nang ngarannya Utuh Kalubut. Tapi inya salawas  satahun tahun tarakhir ne a jarang talihat di Kampung Liur. Usut baisi usut, sakalinyah si Utuh Kalubut ngini lawas mahilang ulih umpat jadi tanaga kerja Indonesia di Arab Saudi.

Lantaran lagi rami isu wabah penyakit di luar negeri lawan, isu handak perang di timur tengah, Utuh ne mamilih bulik ka kampung halaman.

”Kami dangar ikam lawas bagawi di Arab kah wal, maka kada biasa talihat di Kampung? Cair neh…,” ujar Ongol wan Lengkor,  managur Utuh Kalubut pas tadapat di warung Acil Jablay.

”Cair apanya kah, jakanya aku di sana  bajualan es dasar cair banar Ngolai, ulih saban hari panas. Ngini tabalik, jangankan dipadahakan cair, bahujung gin kada aku bagawi di sana. Lucung sama sakali, sukur ha awakku kawa babulik kamari,” ujar Utuh Kalubut manyahut.

”Hauu..hauu…maka ujar urang nangaran bagawi di Arab nitu ganal upahnya, wan kawa salajur bahaji. Mustahil ikam satahun di Arab kada sampat marasai bahaji. Sukur-sukur pulang amun dapat bini urang sana,” ujar Lengkor pulang manyambati si Utuh Kalubut.

”Naa..ngitu pang, kisah urang kada salalu nyaman imbah kita nang manjalani. Iih bagi nang gawiannya lancar, kada bamasalah. Tapi amun nang kada lancar, sial wan bamasalah, alamat membawa derita tu pang kisahnya,” sahut Utuh pulang.

Makin panasaran rupanya Ongol wan Lengkor ne mandangar kisah Utuh pas bagawi di Arab sana, nang pinanya tabanyak dukanya pada sukanya.

”Memangnya napa garang nang ikam gawi di sana Tuh, maka pina sakit banar kisahnya neh. Ujar ku dangar ikam jadi supir juragan minyak goreng, nang paling sugih di Arab sana? Kanapa maka sakit gawiannya?,”ujar Ongol pulang manakuni.

”Naa..itu pang pasalnya, aku tadapat sial gara-gara bagawi lawan juragan minyak goreng  nitu. Aku sampat tapanjara dapatnya, dituntut kaluarganya gara-gara maulah inya cilaka wan maulah hancur mubilnya. Jadi aku talawas di panjara, dari pada nang bagawinya,” sahut Utuh mengisahkan pangalamannya.

”Oooh..amun nang kyitu dasar sakit banar kisahnya Tuh ai. Lalu pang kanapa bisa nang kyitu, maka ikam tamasuk urang nang lihai manyupir. Baya mepet sakilan gin, ikam terkenal wani menyelip orang,” ujar Lengkor manakuni.

”Gara-garanya pas aku manyupirakan juragan nitu,  ada batu  di tangah jalan walai. Malihat nang kyitu juragan tadi lalu bakuciak, Hajar..hajar..hajar..!. Jadi mandangar nang kyitu, kuranjah hetangai batu nitu tadi, sampai tasumbalit mobil nang kusupiri nitu. Bossku nitu tadi luka-luka, mobil ramuk dapatnya. Nitu pang kisahnya maka aku sampai dipecat lalu dituntut urang ka panjara,” sahut Utuh pulang bakisah panjang lebar.

”Haauu…hauu..? maka ikam maumpati perintah juragan ikam jua, kanapa  maka ikam nang dituntut?,” ujar Ongol panasaran.

”Sakalinya nang disambatnya Hajar nitu tadi walai, artinya Batu. Aku kira gin mayuruh aku maranjahnya, makanya ku hajar bahimat. Sakalinya aku nang salah maartiakan, kaingatan manyupiri bubuhan kita surang,” sahut Utuh .

Napa ada, manapak kadahi Ongol wan Lengkor pas mandangar  nang kyitu kisahnya.

”Makanya Tuh ai, lain kali amun ikam ka Arab jangan manjotol mambawa bahasa banjar. Nang kyini pang kajadiannya, tarasai ikam di penjara,”  ujar Lengkor bageleng kapala. (gus)

.