Di sekitaran Kampung Liur ne masih banyak parit wan padang sesabat, nang amun musim hujan ada aliran banyunya. Jadi kadang bisa ada iwaknya, nang kawa gasan diunjuni. Walau pun ada jua nang manyambat, parak padang sesabat nitu, biasanya daerah angker alias bahantu.

Ongol lawan kakawanannya yakni si Gabau, Lengkor, wan Asoy rupanya maunjunan di parit nang parak padang sesabat. Buhannya baampat tadi tulak naik dua buting  mutur bagoncengan.

”Ujar urang diwadah kita maunjun sakali ini ditangani mambawa makanan hintalu, tamasuk jua mambawa lakatan,” ujar Ongol mamadahi kawannya sambil rahatan asik malabuh unjun.

”Baah kanapa pasalnya, sahut Gabau pina kada parcaya.

”Ayuha amun ikam handak mancuba, sanja-sanja ikam bawa hintalu wan lakatan kamari,  bisa ada urang gaib nang managur ikam. Wadah kita maunjun ngini tarkanal angker..!,” ujar Ongol mamadahi pulang.

”Salawas ngini, aku mandangar ujar urang jua. Kada tapi parcaya amun kada biasa maalami,” sahut Gabau pulang. Rupanya Gabau ni, dalam rantang makanannya tadi baistilah mambawa hintalu masak habang gasan sasanguan buhannya.

”Aku iya jua, kisah nangitu mandangar ujar urang jua, kada biasa malihat bujur atawa kada,” ujar Asoy pulang.

Kada karasaan hari parak sanja sudah, buhannya lalu siap-siap bulikan. Lawan iwak kulihan maunjun tadi, palar jua nang dibawa buhannya bulik.  Tapi sabalumnya, makanan dahulu.

”Ngol handak kah hintalu nah?” ujar Gabau manawari iwak makan ka Ongol.

”Iih siniam, pas banar tu,” sahut Ongol.

”Naah, apa jarku, managuk juaai lawan hintalu, maka jar kada bulih,” ujar Asoy manyahuti.

”Aa anu ah, amun mamakannya kada papa ai rasaku. Asal kada mambawanya di jalan ha,” ujar Ongol mambela diri. Kalikikan Gabau wan Lengkor malihat kalakuan Ongol tadi.

Hari pun samakin sanja. Bulan sudah mulai mancungul di langit. Imbah mahabisakan sesanguan makanan tadi lalu buhannya bulikan baimbai. Maka jalan nang dilalui, kiri kanannya padang sabat wara, halus pulang, hampir kadida lalu rumah urang talihat.

”Uuy, singgah dahulu nah, aku handak bakamih banar!,” ujar Gabau nang langsung mamarkir motornya di pinggir jalan. Apa ada, Asoy nang umpat lawan inya tadi tapaksa ai umpat jua batahan, wan salajur bakamih. Ongol lawan Lengkor tadi, umpat basinggah jua sakira tiga meteran dihadapan motor Gabau tadi.

”Jangan lawas lah, jangan kada ingat bapadah lawan padatuan..!,” ujar Ongol mamadahi buhannya.Gabau lawan Asoy tadi lalu bakamih di parit nang sabat, sakira turun 5 meteran pada jalan. Hari samakin kadap wan mulai banyak tadangar suara anjing.

”Uy padatuan, ulun umpat bakamih lah,” ujar Gabau babisik bapadah, sambil mambuka ret saliting salawar.

”Ayuhaa cu ay,’ ujar Asoy nang manyahut sambil bakamih jua dihiga Gabau.

”Ikam ngini jangan tapi mauluii bore ai,” ujar Gabau manunjul kapala Asoy.

Asik buhannya badua bakamih, timbul ”Byuurrrr….!,” bunyi banyu diparit tadi, model ada nang bacabur parak buhannya. Mandangar nang kyitu, pancat Gabau wan Asoy, bahancap bukah mandatangi motornya tadi, padang takakamih di salawar.

”Ini pang gara-gara ikam mahuluti sidin.!” ujar Gabau manyareki Asoy.

”Ampuun, kaii..!” ujar Asoy manyahut sambil bukah ka motor.

Pas buhannya handak naik ka motor. ”Uuuyy,, lajui urang ikam, ada nang manyasah di balakang, siapa nang tadudi ditagok hantuuu..!” ujar Ongol manguriaki wan langsung manggas lawan motor maninggalakan buhan Gabau wan Asoy nang pada pancat katakutan tadi.

Sakalinyaa.. bunyi urang bacabur di sungai wadah Gabau bakamih tadi, gawian Ongol manawak batu ganal. Lantaran hari sudah sanja, wan sakaliling padang sabat, kada sampat malihat Gabau wan Asoy lawan apa nang tacabur ngitu.

Mana badua tadi, langsung pancat takakamih saking katakutanan. Ongol maka lawan Lengkor, mangalikik bajauh sambil manatawaakan Gabau wan Asoy. (gus)