Di Kampung Liur ne, rupanya banyak jua warganya nang katurnunan Tiong Hoa, nang rata-rata bausaha batokoan. Jadi amun sudah jatuh Hari Raya Imlek, kalihatan ja toko atau rumah nang bahias lampion warna habang. Wan biasanya manyadiakan makanan gasan tamu nang baelangan.

Handap kisah, Si Ongol ne rupanya banyak jua baisi kakawanan nang katurunan Tiong Hoa. Jadi pas jatuh Imlek, inya mambawai bininya baelangan, sakaligus silaturahmi.

”Hari ikam kada usah bamasak umanyaai. Kita pacangan makan gratis saharian,” jar Ongol mamadahi bininya, Si Aluh Lintak.

”Hah kanapa abahnya, padahal ulun handak manggangan sayur kaladi,” sahutnya.

”Hari ini kita bakuliling mulai dari hulu ka hilir,  mandatangi kakawanan nang baimlekan..!,” jar Ongol.

”Inggihai amun kyitu. Nyaman ulun basiap,” jar bininya. Kada lawas, tuntung Aluh Lintak tadi badandan.

”Pamulaan kita ka rumah marinanya Anang Gabau, nang katurunan tiong hoa. Imbah nitu hanyar kita ka wadah kawal ku sakolah bahari,” ujar Ongol pas naik motor, sambil mamasang kaca mata hirang.

”Jangan talalu laju bang lah, tasingkap baju ulun kena tatiup angin,” ujar bininya mamasani, sambil babaik ka motor.

Imbah beelang ka rumah marina Gabau tadi, buhannya manyambung ka rumah kakawanan nang memang lawas kada taelangi.  Lalu imbah nitu manyubarang pulang, mandatangi bakas guru Ongol bahari, nang katurunan tiong hoa jua.

Nangaran banyak beelangan tadi, Ongol ne banyak jua bamakanan. Maka rata-rata nang dimakannya lontong basantan, soto, opor, wan daging masak habang. Inya sampai kada ingat lagi amun panyakit lamak dalam darahnya bisa kambuh. Sudahnya ditambah, makanan wan minuman nang manis-manis pulang.

Pas perjalanan bulik ka rumah imbah beelangan tadi, Ongol ne timbul bakajut me rem motor. Maka pina oleng pulang, sampai handak gugur bininya di belakang. Tiba-tiba inya ne bakapinggir.

”Umanyaa..umanyaa..? kanapa panjanakku rasa kadap lah, kapala pina haning?!,” jar Ongol bakakajutan.

”Haah..kadap kanapa abahnya, maka hari sing tarangan..! Amun pian kada kawa manarusakan bamotor, baik kita baistirahat satumat. Cari wadah nang naung,” sahut Aluh Lintak.

Imbah dapat wadah nang tanaung, lalu Ongol ne manyandarakan motornya tadi di pohon nang labat. Lalu baucap: ”Rasanya masih kadap haja panjanakku dingai,” jarnya pulang, sambil pina bagagap.

”Haah..kada kaduanya kah masih bang?,” sahut bininya sambil mangalakak mananawai Ongol.

”Laki ku…lakikuu..,” jar Aluh pulang.

”Kanapa umanyaa? Apakah aku handak tujah?,” sahut Ongol bingung.

”Coba lakasi pacul kaca mata hirang pian nitu, pasti tarangam palihat,” jar Aluh Lintak pada tatawa.

”Astagafirullah, rupanya sapanjang jalan tadi aku ni bakaca mata hirang lah. Kanapakah bisa kada ingat, timbul rasa samakin kadap harinya. Asa raum penjanak..!,” sahut Ongol, wan muha birai kasupanan wan bininya.

”Nitu lain lantaran pian kada ingat pang abahnya, itu lantaran pian kabanyakan makan masakan balamak tadi. Lalu mata liut mangantuk, wan kolesterol pian pasti naik..!,” jar Aluh Lintak mamadahi lakinya. Napa ada, imbah nitu lalu nang bini ai manggonceng nang laki, sampai ka rumah. (gus)