SAMPIT | PANGKALANBUN | PALANGKA | KOTAWARINGIN | METROPOLIS | BARITO | GUMAS | DPRD SERUYAN

METROPOLIS

Senin, 20 Januari 2020 14:50
Gunting Listrik
ILUSTRASI.(RAFI/RADAR SAMPIT)

Hari Senin ini, Ongol diminta komite sakulahan anaknya supaya hadir kasakulahan. Pasalnya ada rapat urang tuha murid, gasan mambahas pambagian saragam gratis. Supaya barasih wan kada karisaan badapat urang tuha murid nang lain, hari Minggu kamarian Ongol baistilah manggunting rambutnya nang sudah karisaan nitu. Lantaran sudah parak 2 bulan kada bagunting.

Untungnya, kawal Ongol si Asoy hanya mambuka jasa bagunting rambut di parak pasar Kampung Liur. Inya sudah pangalaman mamakai gunting listrik, lantaran biasa umpat urang bagawi di salon.

”Guntingan apa ni Ngol, model tentara kah? ,” takun Asoy.

”Tasarah ikam ja wal ai, nang penting rapi rambutku, wan bahindip kaya anak muda wayahini jua,” sahut Ongol, pas mandatangi di rumah Asoy.

”Amun handak potongan model hanyar, nang lagi musim wayahini bisa jua,” ujar Asoy pulang.

Rahatan manggunting rambut Ongol, Asoy ne haur bekisah ja. Ongol ne gaer kalu pina kawalnya nang lumayan bisa mangguntingtu hayal, sampai kada konsen.

”Kenapa haur bekisah ja ikam ne ah, bebaik kada konsen mengguntingnya..!," tagur Ongol.

”Hau..supaya kada mangantuk wal ai, makanya sambil kubawa bakisah. Ayuha ikam tenang ja, tarima beres ja..!,” sahut Asoy

Rupanya laju jua Asoy ne tadi manggunting, rambut Ongol nang labat barataan ngitu sudah tipisam di sebelah kanan. Samantara di sabalah kiri, balum digunting Asoy lagi, ulih masih manuntungakan nang disabalah kanan.

”Haau. Kanapa tatahan wal,” takun Ongol ulih tiba-tiba mati mesin gunting Asoy.

”Hadang dahulu wal lah, aku sakit parut nah, handak kabalakang satumat, sambil baroko sapucuk dulu,” ujar Asoy sambil maingkut parut.

”Astaga ai, nang kyapaam kesah rambut ku neh,” ujar Ongol pina sangkal.

”Ayuhaa ikam tunggu ja, kada kawa dipaksa amun padang sakit parut nah, harus dibuang dahulu sabagian..! Ikam hakunlah, padang babau aku manggunting..!,” ujar Asoy nang sudah padang takantut. Apa ada, pasrah ai muha Ongol, maumpati paraturan tukang gunting.

Parak satangah jam an Ongol mahadangi Asoy.

”Lakasi wal, kena kada tuntung rambutku nah, lempak sabalah masih ne. Aku gair kalu pina mati lampu nah. Wayahini babungulan listrik haur pajah,  sakahandak nang ampun pabrik aja lagi,” ujar Ongol nang sangkal kalawasan manunggu Asoy.

Sakalinya apa nang disambat Ongol tadi kajadian bujur, rahatan handak mehidupkan mesin gunting, sekalinya listrik pajah. Pas hari nang handak hujan pulang.

"Nah iyaam Ngol ai. Harau dasar bujur jar ikam tadi. Matiam kalo lampu nah..!, "ujar Asoy. Maka aku kada baisi genset, babaya maandalakan lampu minyak wara ja di rumah ne pas mati lampu.

Apa ada, habang muha Ongol bacampur masam. Apalagi pas inya maambil carmin malihat rambutnya nang hanyar digunting sabalah, umaa aay masam handak tatangis muha Ongol. Bahimat Asoy manyabarinya, kalu pina Ongol sarong.

”Neaam Soy!..gara-gara ikam kalawasan di jamban, barapa jam am mati lampu ne, nang kyapaam manuntungakannya..!” ujar Ongol bamamai.

”Bisalah aku disalahakan, nang ngaran urang sakit parut kada kawa ku maharitnya. Sudahai kita pakai gunting ja nah lagi malanjutkannya,” sahut Asoy.

Mau kada mau ai rambut Ongol sabalah tadi ditatak lawan gunting nang pina tumpul. Hitungan 10 menit tuntungan Asoy memangkas rambut Ongol.. "Nah sudah tuntungam Ngol ai, hehehe," ujar Asoy.

Lalu si ongol melihat rambutnya di kaca. "Astagaaaa, kanapa pina lempak Soy, waduuuh supan aku, kyini..!” sahut Ongol marasa kada siip guntingan Asoy.

”Nang kyapaam lagi, ulih sabalah pakai masin, sabalah pakai gunting tumpul, lalu nang kyitu jadinya. Isuk ha ikam bawa lagi kamari aku mambujuri pas lampu sudah nyala,” ujar Asoy nang pina kauyuhan jua maladeni Ongol.

Akhirnya Ogol bulik membawa sangkal wan muha nang masam handak tatangis. Mau kada mau isuk inya mamakai kupiah pas mahadiri undangan rapat komite di sakulahan anaknya. Imbah bulik, hanyar inya mambujuri guntingan rambutnya. Tapaksaam sakali ini model guntingan tantara jua nang diolah, alias bagundul.(gus)

 


BACA JUGA

Rabu, 09 September 2015 00:45

Uji Kebohongan, Tim Hukum Ujang Dukung Uji Forensik

<p>&nbsp;PALANGKA RAYA - Tim Kuasa Hukum Ujang-Jawawi menyatakan penetapan hasil musyawarah…
Sitemap
  • HOME
  • HOT NEWS
  • NEWS UPDATE
  • KOLOM
  • RAGAM INFO
  • INSPIRASI
  • FEATURE
  • OLAHRAGA
  • EKONOMI
Find Us
Copyright © 2016 PT Duta Prokal Multimedia | Terverifikasi Dewan Pers