Hari jumahat kamarian, imbah hari nang haur panas mambarangat sakalinya ada hujan labat nang turun. Imbah hujan labat, pastinya waktu malam hawa udara jadi dingin. Bubuhan Ongol wan kakawanannya nang katuju maronda malam gin, mau kada mau ai bajaket tabal, lawan adajua nang balapis lawan kain sarung, supaya kada kadinginan di pos ronda.

”Aku bingung banar wayahini neh, musim pina kada mangaruan eh,” garunum Ongol, pas tadapatan wan bubuhan Lengkor, Utuh Kalubut sagalaan Asoy di pos ronda. ”Apa nang ikam bingungakan Ngol?,” sahut Lengkor.

”Coba ja ikam tangguhi, wayahini ne musim panas kah musim hujan. Kena panas harinya, kena hujan jua turun sing labatan,” jar Ongol pulang. ”Kanapa jua ikam batakun kyitu. Di nagara kita ni Ngolai, baya ada dua musim ja. Musim hujan lawan musim panas,” sahut Utuh.

”Tatap ja ngalih ditangguh walai, karna dipadahakan musim panas ternyata ada ja hujannya. Atau dipadahakan musim hujan, sakalinya mambarangat panasnya,” jar Ongol manangkari.

”Bujur ja ikam jua Ngolai, musim wayahini ngalih ditangguhi,” jar Asoy membela wan inya.

”Tapi amun iwak atau kodok itu nyaman banar ditangguhnya. Bila musim hujan ne, musim babanyu lawan hawanya dingin, jadi buhannya bahintaluan,” jar Ongol sambil mangalikik tatawa.

”Kada jua ah, wayahini kada tapi tagantung musim. Amun memang kodok wan iwak handak bahintaluan, gawi-gawi ai situ. Jadi ja hintalunya,” sahut Lengkor mambahas.

Handap kisah, asik buhannya batangkaran di pos ronda tadi, timbul pajah listrik. Blaap..!. ”Nah iyaam, kadapam kampung kita neh dapatnya. Bahaya ne, bisa ada maling masuk amun kita kada patroli,” jar Lengkor mambawai nang lain.

Buhannya pas basiap handak bakaliling kampung tadi sudah lengkap mamakai jaket, wan kupiah di kapala, sagalaan kain sarung nang malentang di awak, supaya kada kadinginan. Soalnya, imbah hujan labat siangnya.

Samantara Ongol, rupanya kada ingat mambawa tapih, inya baya mamakai baju tangan panjang wara, mana basalawar hendep pulang. Jadi pina kadinginan inya amun dibawa bakaliling kampung. ”Bah iyaam, aku sorangan nang pacangan kadinginan nah. Mainjam pang tapih nah, amun ada nang labihan,” jar Ongol manakuni kakawananya.

”Ini nah ada tapih tabal, gasan mun ada urang sambahyang di pos ne. Pakai ja.!,” sahut Lengkor langsung manjulung lawan Ongol. Imbah Ongol malilitakan kain tadi ka awaknya, nang padang mati lampu nitu, timbul inya kipuh bagaru saawakan. ”Aduuh..aduuh..gatal kam..!,” jarnya sambil malapas wan kain tadi, sambil racap bagaru.

”Astagafirullah..! sorry Ngol, aku kada malihat, ku kira kain sarung nang rancak dipakai urang sambahyang nitu nang kujulung tadi, sakalinya karung bakas urang manjamur banih. Siapa kah nang maandaknya tu bahigaan. Kadap eh kada tapi malihat,” jar Lengkor, langsung mandangani Ongol bagaru, supaya kada sarik wan kamiangan. (gus)