Bubuhan Asoy, Dangdut wan Lengkor wayahini tajangkit jua maitihi media sosial di handphone buhannya. Napa lagi wayahini handphone bubuhannya sudah android nang layar bajapai barataan.
“Uuy, samantang baisi handphone hanyar lah, lalu buhan ikam neh haur batundukja kapala maitihi layar. Gaer amun bagurai kah?” ujar Ongol managuri Lengkor, Dangdut wan Asoy pas buhannya lagi asik mawarungan.
Tatawaan mangalikik bubuhan Asoy tadi mandangar Ongol managur. “Naa yaam tu ikam kada tahu urang wayahini lagi rami baisi nangarannya facebook. Jadi kita pacangan baisi kawan sadunia,” ujar Asoy manyahuti, sambil mahuluti Ongol. “Tatinggalam ikam Ngolai amun wayahini kada baisi facebook nitu. Pacangan nang kaya kodok dalam tampurung..hahaha,” ujar Lengkor pulang umpat mahuluti.
Napa ada, birai muha Ongol imbah dihuluti kakawalannya tadi. Paksa akhirnya inya manyarah jua, lalu handak jua baisi facebook minta lajari lawan Dangdut. “Isuk siang, kita ka warnet. Kena ku lajari ikam baulah facebook, nyaman nang kaya urang wayahini jua,” ujar Dangdut bajanji malajari Ongol.
Kaisukan hari, Ongol badua lawan Dangdut tadi lalu ka warnet, nang sababutingannya ada di tangah pasar Kampung Liur. Imbah mamasan wadah, lalu Ongol nang disuruh Dangdut duduk mahadap lawan komputer di warnet tadi. Urang higa ma higa ruang halus wadah Ongol balajar maulah facebook tadi, pina bingung malihatinya nang pina gagap, ulih hanyar partama masuk ka warnet.
“Na partama, ikam hidupi dahulu komputer ngini. Kam picik tombol nang ada tulisan powernya ngini,” ujar Dangdut mamandu Ongol. “Imbah nitu pang,” sahut Ongol. “Sabar ha, hadangi ja gambarnya muncul dahulu,” ujar Dangdut pulang. Sambil maumpati apa nang dipadah Dangdut tadi, sambil jua Ongol ne maitihi papicikan di keyboard, sambil manggaraki mouse.
“Wal batakun pang, amun picikan tulisan “ENTER” ngini apa maksudnya?,” ujar Ongol. “Ooh, nangitu gasan malajui program,” sahut Dangdut manjelasakan saadanya. “Malajui nang kyapa?” ujar Ongol pulang panasaran. “Maksudnya, malajui apa nang handak kita gawi di komputer ngini. Amunnya tulisannya “ENTAR” berarti lambat inya bagawi. Makanya ditulis urang “ENTER,” sahut Dangdut pulang babarangan manjelasakan, nyaman Ongol ne kada banyak takunan.
Imbah nitu Dangdut malanjutakan malajari Ongol. “Naa..ikam klik lalu buka nang ada tulisannya Internet Explorer nitu, nyaman kita kawa bainternetan mambuka facebook tadi. Imbah nitu, lalu ikam ketik facebook, nyaman inya tabuka wan ikam kawa mandaftar jadi anggota,” ujar Dangdut mamandu Ongol nang masih padang gagap maitihi satu-satu huruf di keyboard.
“Sudah Walai, tapi tatah ha kadida nang tabuka ni. Mananya facebooknya kada talihat?” sahut Ongol pulang. “Ooh, tambahakan huruf “WWW” dimuka tulisan facebook nitu,” ujar Dangdut pulang malajari. “Uuh, mintu kah? Napa pulang maksudnya “WWW” nitu wal?” ujar Ongol pina polos batakun.
“Hmmm, apa yu lah? “pokoknya nangitu kode gasan masuk ka internet. Samacan kita handak masuk rumah tu na wal, ada kode parmisinya,” sahut Dangdut menjelasakan babarangan. “Ooh..paham aku, WWW nitu pasti kapanjangannya Wassalammualaikum Warahmatullahi Wabarakatuuh..,” ujar Ongol sambil takarinyum, maka nyaring pulang manyambat sampai mangalakak tatwaan urang sa warnetan, pas mandangar jar Ongol tadi. Napa ada kasasupanan Dangdut nang taumpat dicangangi urang. (gus)
