Salah satu kawan akrab Ongol yakni si Lengkor rupanya hanya dapat gawian kantoran. Sudah sabulan tarakhir ni inya diterima bagawi di bank. Jadi wayahini inya jarangan takumpulan di warung, ulih sibuk banar bagawi, mana saban turun bagawi harus mamakai baju hem wan badasi pulang.

Jadi pas rahatan Lengkor ne dapat gaji partama, inya mantraktir bubuhan Ongol,  Asoy segala Dangdut bamakanan wan mangupian di warung Acil Jablay. Nangaran ditraktir, himungai buhan Ongol ne, napa lagi nang mantraktir kawal akrab nang hanyar cair kulihan sudah bagaji di bank.

“Lain sudah kawal kita wayahini nah, baju rapi, badasi, wan baduit lagi,” ujar Ongol mamuji Lengkor pas buhannya takumpulan di warung Acil Jablay. “Aaah, biasa ja awalai, nangaran sudah bagaji ngini kawa ha amun baya mantraktir makan. Lain pas samalam aku manganggur, ruku gin haur bautangdi warung,” sahut Lengkor pina marandah.

“Uy wal, amunnya ada lowongan gawian di bank wadah ikam bagawi, habari kami lah. Nyaman kawa jua nang kaya ikam bagawi?,” ujar Dangdut nang masih mangganggur kadida gawian tetap, sama kaya Asoy jua.

“Aku mintu jua wal, munnya kawa lowongan sakaligus manarima badua. Handak jua aku bagawi dikantoran,” ujar Asoy umpat jua bapasan lawan Lengkor. “Ooh, amun wayahini kadida pang lagi lowongan, kenaai imbah hari raya kutakuni bossku, kalu pina ada lowongan gawian,” ujar Lengkor manyahut. Diantara buhannya tadi, Ongol ja nang kada tapi banyak takunan lawan gawian Lengkor wayahini di bank. Inya rupanya kada baliur jadi pagawai.

“Aku sabagai kawal ne umpat himung jua amun ada kawal nang sukses jadi pagawai. Tapi, aku kada hakun paan jadi pagawai nang kaya Lengkor ne,” ujar Ongol marespon pandiran buhannya tadi. “Hauu..kanapa Ngol? Ulih ikam malamar gawian kadida nang menerimanya kah?,” ujar Asoy manakuni sambil mahuluti.

“Sorry walai, aku kada hakun jadi pagawai kadanya ulih kada diterima urang pang lamaran gawian ku. Itu memang aku nang kada hakun bagawi nang mamakai saragam. Padahal banyak ja perusahaan ganal nang manyasah-nyasah lawan aku,” sahut Ongol manyombongi kawalannya.

“Babujur ikam Ngol, barapa buting perusahaan nang mancari ikam tu?” ujar Dangdut panasaran manakuni. “Ada amun lima buting. Dua buting diantaranya perusahaan bank, satunya wadah Lengkor ne bagawi,” sahut Ongol.

“Baah..harat jua ikam ne Ngol, sampai perusahaan ganal nang mancarii. Nang tiga lagi pang perusahaan napa?” takun Asoy pulang. “Nang tiga lagi perusahaan banyu kinum, perusahaan listrik lawan perusahaan dealer motor,” sahut Ongol takarinyum.

“Napa garang kalihaian ikam maka sampai bubuhannya mancarii Ngol?” ujar Lengkor pulang manakuni. “Oooh…nitu gara-gara aku ni urangnya cangkal ja. Alias cangakal bautang wan cangkal manunggak babayar,” makanya buhannya katuju mancarii aku,” sahut Ongol wan muha santai. Manapak ka dahi Lengkor wan Dangdut mandangarnya. “Bedaija disasah perusahaan, amun kacangkalan bukah pas ditagih,” ujar Dangdut manggarunum.

Asoy maka, pas mandangar sahutan Ongol tadi sampai tasambur banyu kupi nang pas rahatan dihirup si Asoy. Maka samburannya pas takana baju bagawi Lengkor nang warna putih bersih pulang.  “Aduuuh gawian ikam ne Soy,  rusak bajuku dapatnya nah..! ujar Lengkor bamamai. “Lain aku biangnya Kor, Ongol ne nah nang mangajuti kita,” sahut Asoy sambil malap akan tisu ka baju Lengkor.  Mangalikik Ongol manatawaakan buhannya. (gus)