Kada karasaan bulan puasa ni sudah parak habis. Kada karasaan jua bagi nang lancar bapuasa, hari raya sudah parak. Buhan kakawanan Ongol yakni si Gabau, Lengkor wan Haji Untat nang memang hobi wan batu akik lagi rami pulang bakisah handak bacari batu cicin nang bagus, gasan baaksi di hari raya kena.
“Wayahini musim batu akik model napa pulang kah nang rami dicarii urang lah Ji?,” ujar Anang Gabau mamanderi Haji Untat pas tadapat di pos ronda, sama-sama handak ka pasar mandatangi buhan pambatuan. Imbah nitu datang si Lengkor, handak mambawai baimbai jua mancari batu gasan cincin tadi.
“Amun aku katuju nang Black Oval kaya nang kupakai niam, tarutama nang ganal,” sahut Haji Untat. “Lalu pang napa nang handak pian cari pulang dipambatuan?,” ujar Lengkor pulang manakuni. “Aku handak bacari amban nang tabagus,sambil balalihat kalu pina ada black oval nang tabagus lagi modelnya,” sahut Haji Untat pulang.
“Wayahini pinanya rami pulang urang nang bacari batu akik warna hijau. Napa lagi parak hari raya ngini,” ujar Lengkor pulang. “Naa..pas banar tu walai, aku handak bacari nang warna nitu jua. Nang hijau lumut atawa nang bacan. Sip nitu dipakai hari raya kena,” sahut Gabau pina basumangat, sambil manggusuk batu akik bacan dicincin nang dipakainya.
Pas buhannya batiga tadi handak tulakan ka pasar mandatangi buhan pambatuan, timbul datang Ongol ka pos ronda nitu, nang langsung umpat manyambung kisah. “Uuii..pina rami nih bakisahan. Kisah THR kah?,” ujar Ongol managuri.
“Ikam ngini kada manyambung Ngolai. Urang mangisah batu cincin, ikam manguya THR. Cuba datang tu dangari dahulu apa nang dikisah urang, hanyar umpat manyambar..!,” sahut Haji Untat managur Ongol. Napa ada kalikikan Gabau wan Lengkor manatawai Ongol nang tamandam, oleh hanyar datang langsung dimamai Haji Untat.
---------- SPLIT TEXT ----------
“Ooh batu akik kah nang rami dikisah matan tadi neh. Memangnyaam, padang bulan puasa ngini memang rami pulang buhan pambatuan bajual. Tapi tatapha ditukari urang sabiji-biji ha. Kadida nang mamburung,” ujar Ongol pulang. “Ikam kira sam wan bajual hintalu atawa bawang kah Ngol, batu akik neh. Maka sampai harus mamburung urang manukarinya..!,” sahut Haji Untat pulang nang hakun jua maladeni si Ongol tadi.
“Batu cicin ni barang spesial Ngolai. Urang manukarinya babutingan wara, kadanya baburungan pang. Kacuali nang gasan dijual pulang,” ujar Lengkor pulang manyahuti. “Yaam ikam ne Ngolai, katinggalan musim. Urang rami bacincin akik, ikam kadada lalu baisi koleksi cincin,” ujar Gabau pulang umpat manyambati Ongol.
“Naaah, jangan salah. Aku kyini-kyini tahu mana batu nang wayahini lagi tren, wan lagi rami dicarii urang. Tu na..urang sampai barabut manukari, banyak nang mamburung pulang,” sahut Ongol kada mau kalah. “Haah..babujur ikam Ngol. Puasa nih. Batu napa ngaannya jar ikam nitu. Ayuam kita mandatanginya, aku handak mambuktiakan pandiran ikam,” sahut Haji Untat timbul panasaran.
“Naaa…amun sampai ka tangah pasar. Buhan pian datangi nangarannya ja julak Utuh, bajualan parak Toko Haji Walet. Disitu sidin banyak bajual batu es, nang lagi rami dirabutakan urang gasan babuka puasa,” sahut Ongol basiap handak bukah.
Napa ada, banaik darah Haji Untat dapatnya mandangar sahutan Ongol nitu tadi. Untung padang puasa, maka sidin ne sudah mancabutam lawan sandal handak manapak ka Ongol. Gabau wan Lengkor kada sing bunyian, baya bagiling kapala ja dapatnya malihat kalakuan Ongol maajaki urang tuha. (gus)
