Kampung tetangga Kampung Liur yakni Kampung Kadap  ada pameran wan pasar rakyat Tapi sakali ini, wadah urang manyalanggaraakan pameran nitu, jauhnya pada kampung liur, mana parak padang sabat pulang nang hanyar ja ditabas. Nah mamanfaatakan lokasi nang jauh nitu tadi, buhan Ongol, Lengkor wan Gabau ne barancana handak mambuka jasa ojek, khusus maantarakan urang bulang bulik kapameran.

“Aku dangar wadahnya nitu jauh walai, mana kadap pulang jar. Jadi kita baimbaian ja bajalan, kalu pina ada begal,” ujar Lengkor pas buhannya bakisahan di pos ronda, sabalum tulakan ka lokasi pameran nitu tadi. “Nah bujur tu, kita kan kada tahu, siapa tahu urang nang manumpang ojek kita nitu begal. Makanya jangan tapisah jauh-jauh amun kita rahatan di jalan,” sahut Ongol.

Sakira jam sambilan malam, lalu tulakan buhannya batiga tadi manuju lokasi pameran wan motor saikung sorang. Jalan nang dilalui manuju lokasi nitu masih tapalar raminya.  Nang lewat ni bamacam-macam manusia. Ada kakanakan bamotor nang kada bahelm, ada jua acil-acil padang pakai kabaya nang haur banyala retingnya, ada jua amang-amang nang padang batapih wara manggonceng anak bininya, sampai kempes ban motor. Imbah nitu banyak jua urang bajualan nang lewat lalu lalang, dari nang bajual pentol, kunjuy, jagung bajarang, bajual baju pakaian, sampai nang baya  bajual karak hintalu. Mintu jua hiburannya, ada nang mambawa sirkus wan artis dangdut, ada nang mambawa komidi putar, sampai ada nang mandiriakan rumah hantu, sagalaan mambawa warik batopeng.

“Uyy Ngol, bagimit ha, jangan laju-laju tapisah kena ngalih amun kita bacacarian..!,” ujar Gabau manguriaki Ongol padang bakandaraan di atas motor manuju lokasi pameran tadi. “Ayuhaa, santai, kita kada bulih batatai bamotor padang urang hibak ngini..!,” sahut Ongol nang mandahului Gabau wan Lengkor tadi.

Saking lajunya Ongol ne bamotor, rupanya tatinggal Lengkor wan Gabau tadi di belakang, sampai inya badua ne kada kawa lagiam malihat wan Ongol. Akhirnya Ongol maninggalakan kawalnya di balakang, nang padang jalan rami hibak urang handak ka pameran.

“Naah iyaam tapisaham kita neh wan Ongol..!,” ujar Gabau manggarunum mamanderi Lengkor. “Biar ha inya badahulu, kena adaja pasti mahabari. Nang penting salamat dahulu sampai ka tujuan,” sahut Lengkor.

Pas hanyar Lengkor bapandir, sakalinya dimuka buhannya tadi jalan timbul macet. Rami urang singgahan,  hibak mangarumun di pinggir jalan. Rupanya ada nang kecelakaan. Malihat nang kyitu napa ada mandibar jantung Lengkor wan Gabau. “Nah Kor, kada kah kawal kita nang hanyar dikuya tadi lah..!?,” ujar Gabau bahancap mamarkir motor langsung mamaraki urang nang mangarumun tadi.

Awak Gabau ne tahitung lamak wan tinggi ganal, jadi nyamannya ja inya manampuh urang nang bakarumun tadi, supaya tahu siapa nang balanggaran nitu. ‘Minggir..minggir..minggir..!,” ulun dingsanaknya, baru ulun jalan..!,” ujar Gabau manyuruh urang nang bakarumun tadi baalih. Napa ada baalihanai urang nang hibak tadi.

Tapi pas dilihat siapa nang takapar di jalan, langsung kasasupanan si Gabau, Lengkor mintu jua nang manuntut dibalakangnya. Sakalinya nang takapar nitu tadi, warik batopeng ampun urang sirkus nang tasarimpit gerobak, oleh ditarik nang ampunnya lawan sepeda mainan.

“Baaah iyaam, aku kira Ongol tadi. Aduuhh, maka talanjur tasambat dingsanak lawan warik ngini,” ujar Gabau manapuk dahi. “Yaam tu, ikam pina musti manyuruh urang baalihan,” garunum Lengkor sambil maharit supan padang dikatawai urang nang basinggahan tadi. Si Ongol maka, sudah badahuluam sampai di arena pameran mahadangi buhannya badua sampai. (gus)