Manjalani puasa hari pertama, Ongol wan kakawanannya sagalaan si Anang Gabau, Lengkor, Asoy wan Dangdut pangoler bagawi. Jadi sudah bangun guring mangalandau, imbah nitu saharian buhannya ni haur bakumpulan ha di pos ronda. Sambil ada nang bamain catur, wan bamain dumino.

“Aku manangguh, salain pangoler bagawian. Pasti bubuhan ikam ne pangoler jua mandi. Pasti mandi pas pacangan parak magrib kena ja,” ujar Ongol mahapaki kakawanannya. Napa mun liwar tahingut bau awak wan bau muntung pas buhannya takumpulan nitu.

“Haah..dari mana ikam tahu Ngol, maka kami baluman mandi neh?,” sahut Gabau. “Aku sudah lah, sorry haja amun sampai babau awakku,” sahut Dangdut protes oleh disambat kada mandi.

“Nyataai aku tahu, mun dari tadi mandangur bau masam awak buhan ikam. Balum nang pas bapander ganal bukaan muntung, jelas sudah batambah baunya. Hihihi..sama haja pang lawan aku jua,” ujar Ongol mangalikik tatawa.

“Amun urang nang puasa, nitu pasti babau muntungnya Ngolai. Ulih inya kada bamakanan wan baminuman saharian wan banyak badiam dari pada bapandir kada karuan. Tapi bau muntung urang nang puasa, diibaratakan bau surga,” ujar Lengkor pulang manyambung pandiran. “Baah bisa banar ikam ne Kor lah, tinggi jua neh ilmu,” sahut Asoy pulang mahuluti Lengkor.

Asik buhannya bakisah kaulu kailir di pos ronda nitu, timbul datang Haji Untat padang batatapih, bajalan batis. “Uuy..buhan ikam napa digawi puasa neh. Maka bacatur ba dom ha gawian..?!, pangoler barataan,” ujar sidin managur. “Anuu ji ai, manyasuaiakan diri hari partama ah,” ujar Ongol manyahuti.

“Naa..pas banar pian datang Ji. Ada nang handak urang ulun takuni, sual bapuasa ngini?,” ujar Gabau pulang. “Haah..napa nang handak buhan kam takuni?,” sahut Haji Untat pulang. “Bujur kah Ji, urang nang bapuasa nitu muntungnya babau surga?,” ujar Gabau pulang.

“Ooh…amun nangitu, dasar bujur ada hadistnya. Maksudnya nitu, urang nang bapuasa, kena di surga muntungnya babau harum. “Amun masih di dunia ngini, tatap ai babau haruk. Napa lagi mun nang imbah saur tadi kada basikat,” sahut Haji Untat mancaramahi bubuhannya.

“Naah..ada lagi sabuting ulun batakun Ji?,” ujar Ongol pulang manyambung, sampai kada jadi Haji Untat handak bajalan ka langgar. “Napa pulang Ngol, nang handak kam takuni?,” sahut sidin. Bingung kakawanannya malihat Ongol nang timbul serius batakun sual agama tadi.

“Tadi kan sual  bau muntung Ji. Naah..amun sual bau kantut urang nang puasa pang, babau apa Ji?. BRRRUUUTTT….,” jar Ongol batakun, sambil padang takantut.

Napa ada mandangar nang kyitu, manjawab sambil basasarik dapatnya Haji Untat. Mintu jua kakawanan nang duduk parak wan Ongol, tahambur barataan sambil malukup hidung wan muntung kalu pina tahingut.

“Kada baadat jua tatakunan ikam ni Ngolai. Rusak pahinakan dapatnya..!,” ujar Gabau manyanyarik. “Ikam tahu lah Ngol, bau kantut ikam ne bau apa. Ngini bau neraka jahanam ngarannya, tahulah..!!?,” ujar Haji Untat pulang sambil mahambatakan sandal ka Ongol, nang sudah baluncat handak bukah bulik ka rumah.

Lengkor, Asoy wan Dangdut maka, kada kawa lagi manahan tatawa sambil malukup hidung, malihat Haji Untat wan sandal sabalah di batis bausaha manyasah Ongol. (gus)